Trafiku i emigrantëve, në pranga dy policë, 6 në kërkim
Numërohen 7 grupe që trafikonin emigrantë në SHBA
Policia e Shtetit dhe Prokuroria e Krimeve të Rënda kanë finalizuar ditën e djeshme edhe pjesën e dytë të operacionit të famshëm kundër grupeve të strukturuara kriminale, që trafikojnë emigrantë.
Bëhet fjalë për operacionin e koduar "One If By Land", të nisur që në mars të këtij viti, ku fillimisht u arrestuan 39 persona në Shqipëri dhe 12 jashtë vendit tonë. Kështu, ditën e djeshme, Policia e Shtetit njoftoi në një konferencë për mediat se janë arrestuar edhe dy efektivë policie të Rinasit, që ndihmonin grupin të kalonin emigrantët nga aeroporti. Ata janë: Almir Doda, lindur në Mirditë dhe banues në Tiranë, për veprat penale të "Ndihmës për kalim të paligjshëm të kufijve", kryer në formën e grupit të strukturuar kriminal dhe Edmond Llaçini, për kryerjen e veprave penale të "Ndihmës për kalim të paligjshëm të kufijve", kryer në formën e grupit të strukturuar kriminal. Detajet për vazhdimin e pjesës së dytë të operacionit i dha shefi i Departamentit të Policisë Kriminale, Eduart Merkaj, së bashku me prokurorin e Krimeve të Rënda, Eugen Beçi, i cili ka drejtuar hetimet qysh në fillim. Sipas Merkajt, hetimet kanë vijuar që pas shkatërrimit të grupeve të para në mars. Sipas Policisë, rezultojnë 7 grupe të strukturuara kriminale, të cilat operonin në Shqipëri, Bullgari, Spanjë, Francë, Republikën Domenikane, Itali, Mbretëri e Bashkuar, SHBA, Kanada, kanë mundësuar kontrabandimin e mbi 300 personave ( shtetas shqiptarë) në drejtim të vendeve, si Mbretërisë së Bashkuar, SHBA- ve dhe Kanadasë. Për çdo person paguhej nga 7000 paund për në Mbretërinë e Bashkuar dhe nga 25.000 - 30.000 dollarë për në SHBA dhe Kanada. Pjesëtarët e këtyre grupeve kriminale përmes veprimeve aktive ndihmonin shtetasit shqiptarë të interesuar për të emigruar në mënyrë të paligjshme drejt vendeve të mësipërme, duke falsifikuar dokumente udhëtimi dhe identiteti të vendeve të BE- së.
ITINERARËT Sipas Policisë së Shtetit, shtatë grupet kriminale përdornin katër itinerare kryesore për të trafikuar emigrantë të paligjshëm në Britani, SHBA dhe Kanada. I pari itinerar ishte ai ku emigrantë nga Shqipëria, fillimisht shkonin në Itali dhe që andej, duke u pajisur me karta identiteti false italiane, hynin në Britani. Itinerari tjetër ishte përmes Francës dhe më pas në Britani. Sa u përket itiner- areve përtej Atlantikut, përdoreshin dy itinerare kryesore. Emigrantët fillimisht shkonin nga Shqipëria në Bullgari. Përmes Bullgarisë kalonin në Belgjikë dhe më pas në Republikën Domenikane. Që andej, ata shkonin drejt SHBA- ve ose Kanadasë. Itinerari i dytë ishte ShqipëriSpanjë- Amerika LatineSHBA/ Kanada. "Ndërkohë, si rrjedhojë e hetimit intensiv dhe bashkëpunimit ndërkombëtar me kërkesë të Prokurorisë për Krime të Rënda, Gjykata e Shkallës së Parë për Krime të Rënda ka nxjerrë masën e sigurimit "Arrest në burg" për 5 shtetas maqedo- nas, si dhe 1 shtetas shqiptar që është punonjës pranë Kompanisë Security të Aeroportit "Nënë Tereza" të Rinasit dhe konkretisht: B. V., lindur e banues në Maqedoni; A. D., lindur e banues në StrugëMaqedoni; G. D., lindur e banues Strugë - Maqedoni; Z. D., lindur e banues në Strugë- Maqedoni; I. M., lindur e banues në Ohër- Maqedoni; E. S, lindur në Durrës dhe banues në Tiranë", tha Merkaj në konferencën për mediat. Nga hetimet e deritanishme rezulton se këta shtetas kishin role drejtuese në këtë grup të strukturuar kriminal.