“Rama amnistoi përdhunuesit, nuk mbrojti vajzën”
Basha: Rama i zhytur në krim, s’ka më asnjë gram ndjeshmërie për një vajzë të përdhunuar
Kryetari i PD, Lulzim Basha, ka reaguar dje ashpër ndaj Kryeministrit Edi Rama, duke thënë se ai tregoi se nuk ka asnjë gram ndjeshmërie ndaj një vajze të përdhunuar nga bandat e tij.
Basha e ka quajtur si të turpshëm qëndrimin e Kryeministrit, pasi nuk doli në mbrojtje të vajzës jetime, por me qëndrimet e tij politike amnistoi përdhunuesit dhe kriminelët e grupit të tij parlamentar, Rrahman Rrajën dhe Taulant Ballën. "Edi Rama është i zhytur aq thellë në kalbësirën e krimit dhe drogës së pushtetit, sa nuk ka më asnjë gram ndjeshmërie prindërore për një vajzë të përdhunuar dhe të torturuar nga banda e tij. Turp! Në vend që të mbrojë vajzën jetime, amniston përdhunuesin dhe kriminelët e grupit të tij parlamentar, Taulant Balla dhe Rrahman Rraja, njësoj siç bëri me përdhunuesin Elvis Roshi dhe trafikantin e vajzave Arben Ndoka", u shpreh demokrati në statusin e tij në "Twitter". Pas mbledhjes së qeverisë në Korçë dhe akuzave të Kryeministrit Edi Rama në adresë të opozitës, Lulzim Basha ka reaguar me një status të dytë po në rrjetin social. Ai ka postuar një video, në të cilin janë vendosur deklaratat e Kryeministrit Rama për rastin e Dritan Zaganit më vitin 20142015 dhe rasti i ish- oficerit të Policisë, Emiljano Nuhu. Për Bashën, Edi Rama i trajton ishefektivët e Policisë, që denoncojnë deputetët dhe ministrat e qeverisë, si kriminelë. "Sa herë kapet në krim, Edi Rama mbron kriminelët dhe sulmon denoncuesit e krimit", thekson Basha, teksa është zotuar se PD do ta çmontojë nga rrënjët këtë projekt, duke miratuar pa vonesa vetingun në politikë.