Vasili: U përdorën gratë e Policisë për të recituar vjershat e Edi Ramës
Kreu i grupit të LSI- së, Petrit Vasili, ka reaguar ashpër ndaj qeverisë, teksa ka thënë se po sulmon heronjtë që luftojnë krimin, ndërkohë që mbron kriminelët. Vasili ka reaguar pas qëndrimit që Kryeministri Rama mbajti ndaj ish- oficerit të Policisë Emiljano Nuhu, të cilin e quajti si "horr". "Heronjtë po denoncojnë krimin, dhunën dhe trafikun e drogës. Maskarai që kryeqeveris fle me kriminelët, zhvat pronën publike, mbush shkollat me drogë dhe mbron dhunuesit. Horrat përfitojnë para, mbrojtje dhe pushtet. Fati i kryemaskarenjve dhe i horrave është i paracaktuar: Fund i tmerrshëm i tyre, pa kthim", ka thënë dje Vasili. Në një status tjetër, kreu i Grupit të LSI- së ka thënë se Rama doli në mbrojtje të deputetëve dhunues, pasi atyre nuk ka çfarë t'i bëjë. "Kryeministri me shumë frikë mezi belbëzoi ca fjalë për dhunimin e vajzës nga Fushë- Kruja. Ka frikë dhe fryhet si derr, sikur ç'do thotë. Ka frikë se deputetëve dhunues, mbështetës të dhunës dhe fshehës të dhunës nuk ka çfarë u bën fare, u rruan bishtin. Ngaqë ka qenë dhunues vetë, nuk dënon dot të ngjashmit me veten. Sa për Policinë, turpin e saj nuk e lan as uji i oqeanit, pasi jo vetëm nuk e mori në mbrojtje vajzën e dhunuar, por dje nxori dy gra police që flisnin pro dhunës ndaj femrës, ky është fundi moral dhe shoqëror i kësaj Policie. Mund të gjenin plot të paturpë, që mund të recitonin vjershat e Edi Ramës, por duhet t'i kishin kursyer ato dy gra nga ky rol i ndyrë në mbrojtje të dhunës ndaj një femre", shkruan Vasili.