Balli Kombëtar në Këshillin Bashkiak i bashkohet PS
SARANDE- "Dezertim" këshilltarësh në Këshillin Bashkiak të Sarandës. Alketa Gjoni, këshilltare e Ballit Kombëtar Demokrat, dhe Eneola Qato nga Balli Kombëtar, i janë bashkuar grupit të këshilltarëve të PS- së në Sarandë. Për rrjedhojë, PS- ja në Sarandë bëhet me 16 këshilltarë, nga 31 që ka ky këshill. Kjo lëvizje këshilltarësh është bërë publike në një takim organizuar mesditën e djeshme me praninë edhe të deputetit të Sarandës, Alket Hyseni, dhe kryetarit të PS- së, Sarandë, Ardi Kola. "Mikesha të reja në PS", i ka quajtur deputeti Hyseni, këshilltaret e reja që janë larguar dje nga grupi i këshilltarëve të djathtë për t'iu bashkuar atij të majtë. "Ato vendosën sot të vijnë me forcën më të mirë, PS- në. Unë besoj që ato do të ndihen si në shtëpinë e tyre, për të mirëpritur dy zonja me vlera. Ne jemi të hapur jo vetëm për ato, por për këdo që mund të kontribuojë në të mirë të qytetit të Sarandës, të zhvillimit të tij dhe të gjithë Shqipërisë", theksoi deputeti i zonës. Ndërkaq, këshilltarja e larguar u shpreh se Partinë Socialiste e konsideronte si një forcë më të sigurt. "Vendosa të largohem nga forca që kam përfaqësuar deri tani dhe t'i bashkohem PS- së, sepse e shoh si forcë më të sigurt", u shpreh këshilltarja Alketa Gjoni. Me kalimin e dy këshilltarëve, e majta tashmë ka shumicën në Këshillin Bashkiak të Sarandës. Largimi i papritur i tyre nuk është komentuar nga përfaqësues të së djathtës dhe as nga forcat politike që u përkasin. Këshilli Bashkiak i Sarandës nuk ka pasur lëvizje të herëpashershme të këshilltarëve, lëvizje të cilat do të përmbysnin shumicën në të. sh. d