Veliaj pret senatorin italian: Të rriten investimet në Shqipëri

Forcimi i bashkëpunimit mes dy vendeve, nxitja e investimeve italiane në Shqipëri, si dhe shkëmbimi i eksperiencave më të mira mes dy vendeve në fusha të ndryshme, ishin në fokus të takimit të një dite më parë midis kryebashkiakut Erion Veliaj dhe senatorit italian Luciano D'Alfonso. Pasi i bëri një rezyme të punës në Tiranë, gjatë tre viteve nën drejtimin e tij, kreu i bashkisë vlerësoi marrëdhënien e veçantë Shqipëri- Itali dhe shprehu optimizmin për ta avancuar më tej këtë raport, të reflektuar në rritjen e numrit të investitorëve të huaj në vendin tonë. "Është një moment special për marrëdhëniet midis Shqipërisë dhe Italisë. Qeveritë ndërrojnë, por njerëzit mbeten, dhe raporti që kemi mes njerëzve është një raport i jashtëzakonshëm, ndaj mezi pres gjithashtu që investimet Abruceze në Tiranë apo në Shqipëri, ato që janë biseduar edhe me Kryeministrin edhe me bashkinë, të mund të ecin përpara. Sot, sipërmarrësit nuk duhen anatemuar, sipërmarrësit janë për t'u përqafuar, nuk mund të bëjmë politikë nëse nuk ka sipërmarrës që punësojnë njerëz, që eksperimentojnë në fusha të reja dhe që në fund i zhvillojnë të dyja kombet, si këndej, si andej Adriatikut". Duke folur për zhvillimet ekonomike, D'Alfonso tha se në Tiranë ka një klimë të mirë të të bërit biznes, pasi qyteti ka aftësi të thithë investimet e huaja, të cilat gjejnë terren të favorshëm për të ushtruar veprimtarinë e tyre. "Në Tiranë gjen shumë mirë edhe projekte investimi nga sipërmarrës italianë. E gjithë kjo i shkon si meritë atij që sot është në qeverinë qendrore, Edi Ramës, por shkon edhe si meritë e atij që është në qeverisjen lokale. Shoh se ju keni kapacitetin për identifikimin e pritshmërive të qytetarëve, të sipërmarrësve dhe keni ndërtuar një qytet që ecën me shpejtësinë e Europën", nënvizoi senatori D'Alfonso. Gjatë takimit me kreun e bashkisë, senatori italian dha të gjitha vlerësimet e mundshme për transformimin që i ka bërë kryeqytetit, madje shkoi më të, duke thënë se ai përfaqëson një pikë referimi ndërkombëtare për atë që ka bërë.