Barça në krizë, Mesi e nis nga stoli dhe “përplaset” në shtyllë
Jo. Kjo Barcelonë nuk mund ta lërë Leo Mesin në pankinë. Sidomos kjo Barcelonë, e zbehtë dhe e pasigurt. Valverde e la jashtë për 55 minuta dhe humbi sërish 2 pikë të rëndësishme. Në "Kamp Nou" përfundon 1- 1 kundër Atletikos së Bilbaos, e cila më parë kishte ndalur edhe Realin. Katalanasit kanë grumbulluar vetëm 2 pikë nga 9 të mundshme në 3 ndeshjet e kampionatit ( barazim me Gironën dhe humbje me Leganesin).
Pa Mesin- Valverde insiston sërish me rrotacionin, ku përveç Mesit lë jashtë edhe Busketsin. E guximshme. Janë pikërisht ata të dy lojtarët më të rëndësishëm të formacionit katalanas. Me Serxhi Roberton si organizator, Rakitiç dhe Vidal luanin më të spostuar. Kutinjo këtë herë ishte në sulm me Dembelenë dhe Suarezin. Në mbrojtje luante Lenglet përkrah Pikesë.
Shënojnë baskët- Barcelona nuk njihet në fushë, ashtu si for- macioni që ka zgjedhur trajneri. Topi nuk qarkullon siç duhet për shumë arsye: ritmi i ngadaltë, Atletiko bën presion. Rreziku i vetëm i Barcelonës vjen në minutën e 30- të me Suarezin, ndërsa baskët luajnë pa komplekse. Uilliams ka një shans të artë duke "djegur" Pikenë, që është me vonesë. Portieri Unai Simon bën dy ndërhyrje shpëtimtare ndaj Suarezit dhe në fund të pjesës së parë Bilbao kalon në avantazh me anë të Oskar De Markos. Sërish nën akuzë Pike, i cili mban në lojë rivalin.
Dy shtylla- Buskets futet në fushë në minutën e 50- të dhe 5 minuta më vonë Mesi. "Kamp Nou" ka besim te "remuntanda" ( përmbysja). Rifillimi është spektakolar për Barcelonën, ku Kutinjo godet traversën. Pastaj vjen edhe një goditje dënimi e Mesit, të cilat zakonisht i shënon. Por në rrëmujë e sipër, topi shkon në shtyllë. Për Barcelonën ishte shtylla e 11- të në 9 ndeshje të këtij sezoni dhe 7 janë të Mesit. Por ky i fundit nuk dorëzohet dhe ia del deri- diku të bëjë diçka për të marrë barazimin. Jep një top për Munir El Hadadin dhe Barcelona shmang humbjen. Suarez shënon më vonë, por është i parregullt. Leo Mesi ndëshkohet me të verdhë për shkak të protestave. Diçka që tregon se Barcelona po kalon një krizë të vogël.