40 fustanet me elemente folklorike që sfiluan historinë në Shkodër
Një shoqëri e emancipuar shquhet për artin, his torinë e kulturën e trashëguar në kohëra. Ato dallohen nga kultura e mbrojtjes dhe e ruajtjes, nga mënyra edhe sesi gëzojnë vlerat e trashëgimisë së tyre kulturore. Përveç vlerave e kërshërive të artefakteve si dëshmi materiale historike, por edhe ato natyrore të ruajtura në shekuj, janë vlerat shpirtërore ato që njerëzit, qoftë edhe individualisht, i kanë dashur, i kanë trashëguar dhe i kanë pasuruar - vlera që bashkërisht edhe sot kemi përgjegjësinë t'i ruajmë e t'i gëzojmë për vete, por dhe për brezat që vijnë pas.
Prej muajsh, "Ti Institute" i është dedikuar pikërisht promovimit të vlerave shpirtërore shqiptare, përmbledhur si një buqetë elementesh artistike të bazuara në folklor e të sjella në suazën e kontekstit bashkëkohor përmes një spektakli të rrallë të ideuar për t'u realizuar ne qytetin e Shkodres. E kur themi "Shkodrën", si do mund të mos realizohej e gjithë kjo pa artin e pasurinë që ofron Muzeu Kombëtar i Fotografisë "Marubi".
Spektakli u realizua mbrëmë në zemër të qytetit të Shkodrës, në pedonale, falë bashkëpunimit mes "TiInstitute" dhe Muzeut Kombëtar të Fotografisë "Marubi". "Marubi i Fshehur" shfaqi përmes rrëfenjave të rralla të së ftuarës speciale Linda Spahiu - që nisi kremtimin e Ditës së Trashëgimisë Kulturore në ambientet e Muzeut "Marubi". Gjithashtu, 4 stilistë shqiptarë, të kthyer në vendlindje, u rrëfyen për frymëzimin e tyre nga folklori shqiptar, i dokumentuar me mjeshtëri nga Marubi. Mbrëmja vijoi me "EtnoVibe Show"; një spektakël i rrallë artistik me elemente të gërshetuara mes tyre për t'u dhënë shkëlqim vlerave kulturore të trashëgimisë, që shpesh, pa dashur, i vesh pluhuri i harresës. Vargje hyjnore të autorëve shkodranë që i thurën "Hymin" qytetit nuk munguan. Fjalët e poezisë së Camajt, Zorbës, Pepës e të tjerë, erdhën prej zërit të artistes së njohur shkodrane, Ema Ndoja. Ekspozimi i 40 krijimeve të posaçme kulmoi spektaklin përmes 15 modeleve të kuruara nga një skuadër profesionistësh.