Salianji publikoi denoncimin: Ministria e Brendshme, si aparat i Sigurimit të Shtetit
Deputeti i Partisë Demokratike, Ervin Salianji, ishte i pari që publikoi në rrjetet sociale denoncimin për plagosjen e Sidian Tabakut, duke akuzuar drejtpërdrejt Policinë e Shtetit për ngjarjen. Salianji deklaroi se ndaj Tabakut është ushtruar dhunë, ndërkohë që askush nuk lejonte t’i afroheshe dhomës së tij në Spitalin Ushtarak. “Policia e shtetit ka gjuajtur me armë dhe ka plagosur qytetarin Sidion Tabaku, pasi e ka plagosur, ka ushtruar dhunë fizike. I plagosuri ndodhet në spital në shtetrrethim që Policia të fshehë ngjarjen. As familjarët dhe askush nuk lejohet të takojë qytetarin. Ministria e Brendshme duhet të marrë masat për të bërë transparencë për ngjarjen dhe të kujdeset për shëndetin e të dëmtuarit. Çfarëdolloj dhune dhe kërcënimi t’i bëjnë, ky nuk do të jetë një Xhisela 2", paralajmëroi Salianji. Paraditen e së martës, deputeti i PD- së ishte në Spitalin e Traumës për të takuar dhe marrë dëshminë e Sidian Tabakut. Salianji publikoi online rrëfimin e plotë të ngjarjes nga 28vjeçari Sidian Tabaku. Në rrëfimin e tij, Tabaku akuzoi drejtpërdrejt efektivët e Policisë për ushtrim dhune dhe goditje me armë, gjatë një ndjekje mesnatën e datës 2 tetor. Pas publikimit të dëshmisë, Salianji ka akuzuar Ministrinë e Brendshme për dhunën e ushtruar ndaj qytetarëve dhe manipulimet që i bën ngjarjeve të ndodhura. Sipas deputetit demokrat, pasi Policia nuk arriti të bindte familjarët e Tabakut për të mohuar dhunën, flet për shkrepje të pavullnetshme të armës. “Me Xhafajn, Ministria e Brendshme është kthyer si aparat i Sigurimit të Shtetit, godit dhe dhuno qytetarët dhe mbulo e ma- nipulo çështjet e bandave të lidhura me qeverinë. MB, pasi nuk e bindi dot qytetarin Tabaku nëpërmjet kërcënimit të tij dhe familjarëve të tij për të thënë që është dëmtuar nga motori dhe jo nga plumbi, reagon duke thënë që arma është shkrepur në mënyrë të pavullnetshme”, deklaroi deputeti i PD- së. Salianji i ka kërkuar Policisë së Shtetit të gjuajë dhe të arrestojë bandat, kriminelët dhe përdhunuesit, që po terrorizojnë qytetarët dhe jo të godasë qytetarët e lirë.