I dënuar në Itali për drogë, i bllokohet 1 milion euro pasuri
“Forca e Ligjit” bllokon pronat e Arben Gropës në Fier
Policia e Shtetit, në kuadër të operacionit "Forca e Ligjit", ka sekuestruar dje 1 milion euro pasuri të paluajtshme, në pronësi të një personi të dënuar në Itali për drogë.
Sipas Policisë, pasuritë e bllokuara dyshohet të jenë të përfituara nga të ardhura kriminale. Bëhet fjalë për pronat e 50- vjeçarit Vangjel Ziaj nga Fieri, i njohur edhe me emrin Arben Gropa. Ai u bë i njohur rreth 4 vite më parë, kur pasi u arrestua me qëllim ekstradimi drejt Italisë, ku ishte person në kërkim, u arratis nga "arresti shtëpiak". Policia tha dje se në kuadër të luftës kundër krimit të organizuar dhe pastrimit të parave, gjurmimit, gjetjes, sekuestrimit me qëllim konfiskimi të aseteve kriminale që rrjedhin nga veprimtaria kriminale, është bërë sekuestrimi i pasurive të Ziajt. Ndërsa procedimi penal i regjistruar për veprën penale "Pastrimi i produkteve të veprës penale ose veprimtarisë kriminale" parashikuar nga Neni 287 i Kodit Penal për hetime të pasurisë së shtetasit Vangjel Ziaj ( Arben Gropa), kishte nisur prej disa muajsh. PASURITE E BLLOKUARA Burime zyrtare të Policisë së Shtetit thanë dje se në përfundim të veprimeve të kryera, nga ana e Sektorit për Hetimin e Krimit Ekonomik e Financiar në Drejtorinë Vendore të Policisë Fier në bashkëpunim me Prokurorinë e Rrethit Gjyqësor Fier, u zbatua vendimi i Gjykatës së Rrethit Gjyqësor Fier për sekuestro preventive në lidhje me pasuritë e shtetasit Vangjel Ziaj, 50 vjeç, banues në Fier. "Ky shtetas është dënuar nga autoritetet italiane me 32 vjet e 6 muaj burg për veprën penale ' Trafiku i narkotikëve' dhe është duke vuajtur dënimin në Itali", tha Policia. Ndërsa renditi edhe pasuritë e sekuestruara, që kapin vlerën e 1 milion lekëve. Mësohet se janë vënë nën sekuestro: Kompleks shërbimesh "Pelikani" i ndodhur në lagjen "Sheq i Madh" Fier; Një apartament me sipërfaqe 70 metra katrorë në lagjen "Kryengritja e Fierit"; Një automjet i markës "Benz". Policia tha se vijon puna për identifikimin e pasurive të tjera që mund të ketë ky shtetas dhe personat e lidhur me të.
I DENUARI Vangjel Ziaj i njohur edhe si Arben Gropa, u arrestua më 20 janar të vitit 2014, gjatë operacionit të koduar "Pelikani", pasi ishte dënuar nga drejtësia italiane me 32 vjet burg për veprën penale të trafikut të drogës me vlerë rreth 300 milionë lireta. Në pritje të ekstradimit, ai u la në "arrest shtëpie" nga autoritetet shqiptare, por u arratis 7 muaj më pas, më 30 korrik 2014, kur një oficer i Policisë së qytetit kishte shkuar për ta arrestuar për llogari të dënimit në Itali. Ndërkohë që rreth një vit më pas u arrestua dhe u ekstradua në Itali për të vuajtur dënimin me 32 vjet burg. Gropa është pronar i lokalit luksoz "Pelikani" në këtë qytet si dhe aksioner në ndërtime.