Fajon: Nuk është koha për zgjedhje në Maqedoni, respektoni marrëveshjen

Deputetja nga Grupi i Socialdemokratëve europianë, Tanja Fajon, është shprehur shumë e kënaqur me mbështetjen bindëse që qytetarët e Maqedonisë dhanë për marrëveshjen e Greqisë, edhe krahas faktit që shqetëson pjesëmarrja e pamjaftueshme. Sipas saj, tani radhën e ka Kuvendi për miratimin e amendamenteve kushtetuese. "Kryeministri Zoran Zaev e ka mbështetjen time të plotë dhe shpresoj se Marrëveshja do të miratohet, secili skenar tjetër nënkupton kthim prapa", tha Fajon për agjencinë maqedonase të lajmeve "MIA". Ajo beson se Marrëveshja ende ka mundësi të miratohet. "Anëtarësimi në BE dhe NATO është skenari më i mirë për Maqedoninë", theksoi Fajon, duke këshilluar krerët politikë dhe opozitën që të tregojnë pjekuri dhe mençuri dhe të vendosin interesat e Maqedonisë para interesave personale. Fajon siguroi se BE- ja dhe NATO- ja do të vazhdojnë ta mbështesin Maqedoninë në periudhën e ardhshme që të mund të realizohen qëllimet euroatlantike të vendit. "Sa i përket bojkotit, ne nuk e dimë se kush janë ata njerëz të cilët kanë bojkotuar dhe pse, unë i ftoj të gjithë qytetarët që të ndërmarrin përgjegjësinë për shtetin e tyre", tha ajo. Fajon vlerëson se opsioni për zgjedhje të parakohshme nuk është më i miri. "Nuk jam e sigurt se sa njerëzit kanë dëshirë përsëri të dalin në votime. Tani është koha që Maqedonia të stabilizohet, nuk është koha për zgjedhje. Maqe- donia duhet të jetë stabile dhe e fuqishme", theksoi Fajon, duke vlerësuar guximin e Kryeministrit maqedonas, Zoran Zaev. "Qeveria e Maqedonisë, pas 27 viteve bëri një marrëveshje të tillë për zgjidhjen e atij kontesti, kjo është historike, gjithçka tjetër është pjesë e mbështetjes ndërkombëtare", tha Fajon.