Ashpërsohet fushata për në Kongres

Zgjedhësit amerikanë do të votojnë për Kongresin e ri pas disa javësh dhe vendimi i tyre do të ketë ndikim të madh në dy vitet e fundit të mandatit të Presidentit Trump. Zgjedhjet janë të rëndësishme, pasi mund të përmbysin shumicën e republikanëve të Trump në Kongres. Opozita demokrate shpreson që më 6 nëntor të marrë nën kontroll Dhomën e Përfaqësuesve. Beteja polarizuese mbi kandidatin për Gjykatën e Lartë, Brett Kavanaugh, duket se i ka mobilizuar votuesit nga të dyja partitë. Sipas "VOA", Presidenti Trump në aktivitetet e fushatës për të rritur përkrahjen për kandidaturën e gjykatësit Brett Kavanaugh, tha se, "Unë nuk jam në garë, por në fakt jam, prandaj edhe kam shkuar gjithandej për këta kandidatë të shkëlqyer. E shihni çfarë po ndodh, i shihni këto grupe të ulëta, radikale demokratësh, e shihni ç'po bëhet?". Christine Blasey Ford e ka akuzuar gjykatësin Kavanaugh për ngacmime seksuale. Por ai e mohon këtë. Ndërkohë që debatet janë shtuar për procesin e konfirmimit të gjykatësit, Presidenti po përpiqet të mobilizojë bazën për t'u siguruar fitore republikanëve në zgjedhje. Edhe demokratët po mobilizojnë votuesit. Ish- Presidenti, Barak Obama, tha se "Njerëzit mendojnë: ' Po pres sa të vijnë zgjedhjet presidenciale'. Por në fakt këto zgjedhje janë shumë të rëndësishme. Janë edhe më të rëndësishme se çdo zgjedhje që kemi pasur prej një kohe të gjatë". Votuesit demokratë janë mobilizuar, por edhe ata republikanë. Votimi do të ketë një garë shumë të fortë dhe mbase me surpriza.