Dibala dhuron spektakël në sytë e Ronaldos, ngecin Real e Bajern
U mbyllën me fitoren e skuadrave "big", 2 sfidat e para të ditës së martë. Juventusi ka mposhtur Jang Bojsin me rezultatin 3- 0, ku protagonist absolut ka qenë argjentinasi Paolo Dibala, i cili ka shënuar tripletë në këtë takim. "Magjinë" e Dibalës e ka ndjekur edhe Kristiano Ronaldo, nga tribuna, i cili duhet të ndihet i kërcënuar, falë formës së shkëlqyer që po kalon argjentinasi. Ndërkohë, Mançester Siti ka fituar me përmbysje përballë Hofenhemit, duke siguruar kështu fitoren e parë në Ligën e Kampionëve për këtë sezon. David Silva ishte heroi i "qytetarëve" që me golin e tij i dha fitoren skuadrës së Guardiolës, që e shikon veten në kuotën e 3 pikëve.
Argjentinasi - Në prononcimin pas ndeshjes të dhënë për "Sky Sport", tregoi se stoli i ka bërë mirë për të shtuar përqendrimin. Dibala foli gjithashtu edhe për Ronaldon. "Skuadra e përballoi ndeshjen me përqasjen e duhur. Mund të kishte rënie, por u treguam të zotët. Qëndrimet në pankinë? Natyrisht që preferoj të luaj gjithmonë. Vitin e kaluar e nisa me shumë gola, më pas pësova rënie. Krejt ndryshe, këtë vit, qëndrimi në stol më ka mundësuar që të shtoj përqendrimin për të bërë punën time. Ronaldo? Me atë është më e lehtë, por duhet të jemi gjithmonë të përqendruar kur është dhe atëherë kur nuk është. Sot luajtëm si skuadër e madhe", deklaroi Dibala
Goleada - Roma ka dhuruar spektakël dhe ka treguar se është rikthyer në formën më të mirë. Pesë gola ndaj Plzenit kanë rikthyer besimin dhe euforinë te skuadra kryeqytetase italiane. CSKA e Moskës e ka nisur me gol ndaj realit. Që në minutën e dytë, Vlasiç ka zhbllokuar sfidën që ka mbetur në fuqi deri në fund. Reali del me turp. Madrilenët kanë ruajtur shumë mungesat e formacionit. Një gol i Humels në të katërtën minutë dha idenë e një goleade shëtitëse për Bajernin, por barazimi i Ajaks në të 22' mbeti në fuqi deri në fund. Si për ta traumatizuar mbrëmjen, një tranversë në fund për holandezët, mund ta kishte shndërruar në një disfatë të rëndë për bavarezët.