Pronat me 7501, Qeveria ndryshon dokumentet për të marrë tapinë, kategoritë që përfitojnë
ZBARDHET VENDIMI I PLOTE. FAMILJET QE PERFITOJNE NGA LEHTESITE E REJA
Lehtësohet procesi për familjet që ende nuk janë pajisur me aktin e marrjes së tokës në pronësi.
Kur kanë mbetur edhe 3 muaj nga përfundimi i afatit për regjistrimin e pronave të ndara me Ligjin 750, Qeveria ka menduar të ulë barrën financiare për ata fermerë, të cilët janë në pamundësi ekonomike. Përmes një vendimi të miratuar dje, përgjegjësia për hartimin e planvendosjes u kalon bashkive. Do të jenë këto të fundit që nëpërmjet topografëve të tyre të kryejnë matjet, duke përcaktuar kufijtë dhe kufitarët. “Në rastet kur përdoruesit faktikë janë në pamundësi financiare për hartimin e planvendosjes së ngastrave të tokës bujqësore që kanë në përdorim, ato kryhen me shpenzimet e bashkive nëpërmjet topografëve të tyre”, thuhet në vendimin e ndryshuar. Kjo vlen jo vetëm për tokat bujqësore të ishndërmarrjeve bujqësore, por edhe për ish- kooperativat. Në vendim është specifikuar se kërkesat për pajisjen e AMTP duhet të bëhen pranë bashkive, në juridiksionin e të cilave ndodhet toka bujqësore. Kjo, pasi mund të ketë familje që kanë ndryshuar vendbanimin e për pasojë vlen të theksohet se aplikimet duhen bërë në atë njësi ku është pretendimi për tokë. Krahas kërkesës për pajisjen me aktin e përdorimit nga komisionet e ndarjes së tokës ( për ata që ende nuk e kanë) kërkohet edhe certifikatë familjare, të lëshuar nga zyra e gjendjes civile e bashkisë, ku të pasqyrohet numri i anëtarëve të familjes përfituese, në favor të të cilit do të lëshohet akti i marrjes së tokës në pronësi, sipas gjendjes më 1 gusht 1991, si edhe dokumentacionin që vërteton se janë përfitues, si rezultat i lëvizjes nga qendrat e tyre të banimit.
AFATET
Në 31 dhjetor skadon edhe afati për pajisjen e fermerëve me aktin e marrjes së tokës në pronësi. Qeveria ka paralajmëruar se nuk do të ketë me shtyrje të afatit. Duke nisur nga 1 janari i vitit që vjen, familjet të cilat nuk do të pajisen me këtë dokument, do të duhet të ndjekin rrugën ligjore për të fituar të drejtat mbi pronën që kanë në përdorim. Për tokat në ish- ndërmarrjet bujqësore Qeveria ka hequr kufizimin. Në vendimin e mëparshëm ishte përcaktuar se dorëzimi i kërkesave duhej të bëhej tre muaj para përfundimit të afatit. Me ndryshimet e miratuara dje, ky kufizim është hequr duke lejuar familjet që të aplikojnë deri në fund të këtij viti. Nga të dhënat e Ministrisë së Bujqësisë mësohet se deri më tani janë plotësuar 7149 tituj pronësie, që u korrespondojnë 3470 familjeve bujqësore. Ndërkohë, janë në proces të plotësimit edhe 9427 tituj, që u korrespondojnë 5029 familjeve bujqësore.
NDRYSHIME
Ndryshime pritet të ketë edhe për regjistrimin e titujve të pronësisë në Hipotekë. Një pjesë e konsiderueshme e familjeve që e kanë marrë AMTP, nuk kanë mundur të pajisen me certifikatën e pronësisë. “Aktet e Marrjes së Tokës në Pronësi janë plotësuar para rreth 25 apo 20 vjetësh dhe nga individë që nuk kanë qenë shumë të trajnuar për përmbushjen e kësaj detyre shumë specifike. Kështu, titujt janë plotësuar edhe me disa mangësi, që bëhen pengesë për regjistrimin e tyre. Në këto ndryshime është parashikuar që organet e qeverisjes vendore, në bazë të verifikimeve në dokumentacionin që disponojnë dhe në terren, të shmangin mangësitë që nuk cenojnë vlefshmërinë ligjore dhe të konfirmojnë lëshimin e këtyre titujve. Në shumë fshatra janë lëshuar Akte të Marrjes së Tokës në Pronësi, ku është përfshirë toka e dy familjeve, e babait dhe e djalit të ndarë nga familja e origjinës. Në këto raste do të pranohen për regjistrim këto akte me pranimin me shkrim të të dy familjeve edhe konfirmimin e bashkisë. Gjithashtu, vendimi është i plotësuar edhe me formate të unifikuara për dokumentacionin e nevojshëm”, ka pohuar më herët Majlinda Bozgo, përgjegjëse e sekretariatit teknik pranë komisionit qeveritar të tokës në Ministrinë e Bujqësisë.