Master te “Luarasi”, risitë për vitin e ri akademik
Zv. rektorja Dasho: Master në IT, lidhje mes teknologjisë e biznesit
Kërkesa në rritje e biznesit dhe tregut të punës për profesionistë të teknologjisë së informacionit ka gjetur vend në një prej universiteteve më të mira në vend.
Bëhet fjalë për “Luarasin”, i cili këtë vit akademik, përpos profileve të larmishme në drejtësi dhe ekonomi vjen me dy degë shtesë, profile të fakultetit më të ri, atij të Teknologjisë së Informacionit dhe Inovacionit. Zv. rektorja për kërkimin shkencor pranë Universitetit “Luarasi”, Prof. Assoc. Anni Dasho Sharko, jep më tepër detaje mbi ofertën akademike të këtij viti bashkë me risitë. “Këtë vit të ri akademik Universiteti ‘ Luarasi’ vjen me një fakultet të ri, atë të Teknologjisë së Informacionit dhe Inovacionit. Në pjesën e programeve master, dy programet që ofrojmë janë: Master Profesional në Sigurinë Kibernetike dhe Informacionit dhe Master Shkencor në Teknologjinë e Informacionit dhe Inovacion. Këto programe kanë për qëllim të krijojnë një urë organike mes teknologjisë së informacionit dhe biznesit. Programi ndihmon jo vetëm me njohuritë teknike, por dhe ata me eksperiencë në fusha të tjera. studentët në këtë program kanë mundësi të zhvillojnë perspektivën holistike lidhur me teknologjinë dhe bizneset, si dhe kanë mundësi të mësojnë se si të identifikojnë nevojat e biznesit dhe të zhvillojnë strategji të ndryshme për të plotësuar këto nevoja, të krijojnë raste për të vlerësuar dhe justifikuar investime të ndryshme të bizneseve në teknologji, komunikojnë në mënyrë efektive me liderët e biznesit për teknologjinë. Profili i sigurisë kibernetike dhe i sistemeve të informacionit është një përgjigje e drejtpërdrejtë për kërkesën e bizneseve dhe tregut të punës në fushën e teknologjisë së informacionit”, sqaron zv. rektorja.
REGJISTRIMET Regjistrimet sapo kanë nisur dhe do të zgjasin rreth një muaj. Sakaq, stafi akademik i universitetit pret çdo ditë të interesuarit, qoftë për informacione më të detajuara apo për t’u regjistruar. “Për të gjithë studentët e nivelit master, regjistrimet janë të hapura deri në 6 nëntor. Në çdo moment mund të vijnë të konsultohen me pedagogët e Fakultetit të ri të Teknologjisë së Informacionit për zgjedhjen e duhur, si në Master Profesional të Sigurisë Kibernetike dhe të Informacionit me 60 kredite, ashtu dhe në Masterin Shkencor Teknologjia e Informacionit dhe Inovacionit që është 2 vite”. Në përfundim të shkollimit në ciklin e dytë të studimeve, të diplomuarit do të kenë mundësi jo vetëm të identifikojnë nevojat e biznesit, por të propozojnë edhe zgjidhje mbështetur në teknologji avangarde.
FAKULTETI I RI Pak ditë më parë kremtoi vitin XV me qindra të diplomuar në katërmbëdhjetë breza përgjatë këtij harku kohor. Cilësia e mësimit në këtë universitet, vulosur nga ekspertët britanikë të verifikimit të cilësisë dhe faktuar me punësimin e menjëhershëm pas diplomimit të të rinjve të “Luarasit”, kanë bërë që ky universitet të rritet pak nga pak çdo vit. Nga kolegj universitar, këtë vit “Luarasi” vjen me një status të ri, universitet. Që në maj të këtij viti, Ministria e Arsimit, Sporteve dhe Rinisë aprovoi hapjen e një fakulteti të ri për Teknologjinë e Informacionit dhe Inovacionit, ku përfshihen tri departamente: Departamenti i Teknologjisë së Informacionit e Inovacionit, Departamenti i Informatikës Ekonomike dhe Departamenti i Matematikës e Statistikë. Kjo risi te “Luarasi” dëshmon se ky universitet është afër nevojave të tregut me programe që sigurojnë punësim në të ardhmen e afërt.