“Të vendosur kundër krimit të organizuar”
Drejtori i Policisë Kriminale: “Forca e Ligjit”, efikase
Në mbyllje të Konventës së Drejtorëve të Policisë Kriminale të Europës Juglindore, drejtori i Policisë Kriminale, Eduart Merkaj, u shpreh dje se Policia e Shtetit është e vendosur në luftën kundër krimit të organizuar. Sipas tij, operacioni "Forca e Ligjit", e dëshmon fare qartë vendosmërinë e Policisë në këtë drejtim, pasi deri tani ka rezultuar shumë efikase. "Sfidat e Sigurisë lidhur me Krimin e Organizuar, Krimet e Rënda dhe Rritjen e Flukseve Migratore dhe Kontributi për veprimet e IISG", ishte tema e diskutimeve në Konventën e zhvilluar në Tiranë nga data 1- 3 tetor 2018. Ky takim i rëndësishëm u organizua nga Shqipëria, e cila ka kryesinë e radhës së Konventës së Bashkëpunimit Policor në Europën Juglindore ( PÇ SEE). Në Konventë, përveç drejtorëve të Policisë Kriminale të vendeve palë të Konventës së bashkëpunimit Policor për Europën Juglindore, morën pjesë edhe partnerë të tjerë dhe organizma ndërkombëtare, si Europol, DEA, Eurojust, UNODC, IPA, SELEC, etj., që në fokus kanë çështje të zbatimit të ligjit dhe bashkëpunimin policor rajonal dhe më gjerë. Në fund të punimeve, nga të gjithë të pranishmit u vlerësua bashkëpunimi i deritanishëm me Policinë e Shtetit, si dhe u ra dakord që ky bashkëpunim të thellohet në drejtim të shkëmbimit në kohë reale të informacionit nëpërmjet PÇ dhe SEE si koordinator të thello- het lufta ndaj trafiqeve të paligjshme dhe kontrabandimit të emigrantëve, si dhe të zhvillohen hetime dhe operacione të përbashkëta për goditjen e grupeve kriminale, të cilat sot kanë natyrë dhe shtrirje ndërkombëtare. Drejtori i Departamentit të Policisë Kriminale, Eduart Merkaj, në emër edhe të Drejtorit të Përgjithshëm të Policisë së Shtetit, siguroi homologët dhe pjesëmarrësit e agjencive ligjzbatuese se Policia e Shtetit është e vendosur dhe e fokusuar në luftën kundër krimit të organizuar, e cila sot ndjek një qasje më gjithëpërfshirëse dhe efikase përmes operacionit "Forca e Ligjit", si dhe bashkëpunimit të ngushtë me partnerët, me qëllim evidentimin dhe goditjen e plotë të grupeve kriminale, duke zhvilluar hetime dhe operacione të përbashkëta për këtë qëllim.