“Shoqërohet me trafikantë”, opozita letër Ruçit për Taulant Ballën
“Shoqërohet me trafikantë, është jo vetëm i papërshtatshëm për postin që mban, por edhe kundërproduktiv në optikën e BE”
Opozita, përmes një letre drejtuar kryetarit të Kuvendit, Gramoz Ruçit, kërkon largimin e Taulant Ballës nga Delegacioni Parlamentar i Stabilizim- Asociimit, duke e akuzuar atë se shoqërohet me trafikantë droge dhe mbron përdhunues me pushtet. Letra drejtuar kryetarit të Kuvendit, Gramoz Ruçi, është firmosur nga anëtarët e opozitës në Delegacion, Genc Pollo, Albana Vokshi, Klajda Gjosha, Jorida Tabaku dhe Oerd Bylykbashi, të cilët kërkojnë zëvendësimin e Ballës me një tjetër socialist, pa lidhje kriminale. Anëtarët e opozitës vënë në dukje se Taulant Balla nuk mund të përfaqësojë Kuvendin në marrëdhëniet me Parlamentin Europian, për shkak se mbi të rëndon akuza se ka marrë pjesë në kërcënimin me pistoletë në kokë të një oficeri policie, që ai të mbyllte çështjen e përdhunimit të djalit të një deputeti tjetër socialist.
KUVENDI Tiranë, 5 Tetor 2018 Për: Z. Gramoz Ruçi, Kryetar i Kuvendit
I nderuar zoti Kryetar,
Më datën 15 tetor 2018 në Bruksel është planifikuar mbledhja e radhës e Komisionit të Përbashkët të Stabilizim- Asociimit i përbërë nga deputetë përfaqësues të Kuvendit Shqiptar dhe të Parlamentit Europian. Kryetar i delegacionit të Kuvendit dhe bashkëkryetar i Komisionit të Përbashkët është Taulant Balla, deputet nga Grupi Parlamentar i Partisë Socialiste. Ne besojmë se jeni i informuar për lidhjen shoqërore e familjare të deputetit Taulant Balla me shtetasin Edmond Bego, i dënuar me 21 vite burg nga gjykatat italiane për trafik droge.
Ky shtetas, pas vitit 2013 ka përfituar rreth 14 milionë euro nga kontratat publike, më së shumti në zonën zgjedhore të z. Balla. Këto kontrata janë në kundërshtim me ligjin, duke qenë se, sipas legjislacionit tonë, specifikisht ligjit "Për Prokurimet Publike" parashikohet se personave, që janë dënuar me vendim të formës së prerë për pjesëmarrje në një organizatë kriminale, u ndalohet pjesëmarrja në tenderë shtetërore.
Gjithashtu, besojmë se ju jeni vënë në dijeni se, sipas dëshmisë së nënkomisarit të Policisë Emiliano Nuhu, deputeti Taulant Balla bashkë me deputetin Rrahman Rraja, me të vëllain e të birin e këtij të fundit kanë hyrë në zyrën e nënkomisarit në Stacionin e Policisë Fushë- Krujë dhe e kanë kërcënuar; vëllai i deputetit Rrahman Rrahja i ka drejtuar pistoletën në kokë, duke i kërkuar mosarrestimim e mosfillimin e hetimit ndaj shtetasit Rexhep Rraja, i biri i deputetit, në vijim të kallëzimit të znj. Xhisela Maloku për përdhunim e plagosje në dëm të saj. Edhe burime e prova të tjera duket se konfirmojnë kallëzimin e znj. Maloku dhe deklarimet e nënkomisarit Emiliano Nuhu, përkundrejt mohimit nga deputeti Balla se ka qenë pjesë e kësaj ngjarje.
Rivendosja e besimit publik në institucionet e shtetit, lufta pa kompromis ndaj kriminalitetit e korrupsionit, sidomos në postet publike, janë një domosdoshmëri për vendin tonë. Ato janë edhe kyçi i avancimit në integrimin evropian, sidomos në këtë fazë kritike kur vendi ynë duhet të përmbushë kushtet e Këshillit Europian të qershorit 2018 për të mundësuar një vendim pozitiv për hapjen e negociatave të anëtarësimit me BE- në në vitin 2019.
Në këto rrethana, gjykojmë se deputeti Taulant Balla është jo vetëm i papërshtatshëm për postin e sipërpërmendur në Komisionin e Përbashkët, por edhe kundërproduktiv në optikën e Bashkimit Europian. Për këtë arsye, ju kërkojmë që bazuar në nenin 7/ 3 të Rregullores së Kuvendit, brenda datës 15 tetor të përcaktoni në këtë post një deputet tjetër nga Grupi Parlamentar i Partisë Socialiste. Mbetemi në pritje të një përgjigjeje të shpejtë e pozitive. Sinqerisht, Anëtarët e Delegacionit të Kuvendit në Komisionin e Përbashkët të Stabilizim- Asociimit
Genc Pollo, Albana Vokshi, Klajda Gjosha, Jorida Tabaku, Oerd Bylykbashi