Meta rivendos pllakën e dëshmorëve të Tendës së Qypit
“Më shumë përkujdesje për monumentet e luftës dhe të dëshmorëve tanë”
Pas kthimit nga vizita zyrtare në SHBA, Presidenti i Republikës, Ilir Meta, u rikthye në vendlindjen e tij për të përkujtuar momente të rëndësishme të historisë. Ai është kujdesur për rivlerësimin e betejës heroike të Tendës së Qypit dhe nderimit të dëshmorëve të rënë në të. “Kisha nderin sot që bashkë me kryetarin e Bashkisë së Skraparit, zotin Nesim Spahiu, të rivendosnim pllakën përkujtimore me emrat e 17 heronjve të rënë në betejën madhështore të Tendës së Qypit nga 20- 26 janari i 1944s, në kulmin e Operacionit të Dimrit. Kjo betejë e jashtëzakonshme, deri në ndeshje trup me trup, përfundoi me humbjen poshtëruese të pushtuesve falë gjakut të derdhur në betejë të partizanëve të Brigadës së Parë Sulmuese dhe Grupit të Skraparit, që u drejtua trimërisht nga Zylyftar Veleshnja. Kjo betejë pati një vlerë të madhe morale e psikologjike, pasi tregoi se ai nuk ishte dimri i fundit i partizanëve, por i pushtuesve. Të gjithë të përkujdesemi më shumë për monumentet e luftës dhe të dëshmorëve tanë”, shkruan Meta në një postim në “Facebook”. Duke treguar për takimet në vendlindjen e tij, kreu i shtetit ka ilustruar dhe me fotografi emocionet e tij. “Ishte kënaqësi të kaloja një mbrëmje të mrekullueshme në Prishtë, këtu ku mikpritja është e rrallë. Më në fund e mbajta fjalën për të vizituar nënë Bajamen, e cila me sakrifica pa fund ka rritur tre fëmijë të mbarë e të edukuar, për të cilët është krenare me të drejtë. E falënderoj për mikpritjen e bujarinë e pafund ashtu siç dinë nënat e Skraparit”, shkruan Presidenti Meta. Vizitën e tij kreu i shtetit e ka vazhduar në Teqenë e Prishtës dhe menjëherë ai ka postuar tekstin, ku shkruan se “Kënaqësi e veçantë të vizitoja sot Teqenë e Prishtës, një nga vatrat më historike të Bektashizmit dhe atdhedashurisë, këtu ku në janar 1921 u mbajt Kongresi i Parë Botëror i Bektashinjve”. Ndërkohë, Presidenti ka vazhduar vizitën në këtë fshat historik. “Kënaqësi të vizitoja Nishicën, këtë fshat tepër punëtor që i ruan të forta traditat. Këtu ku këngët e para dhe të fundit janë për Riza Cerovën e Zylyftar Veleshnjën. Nishica u shndërrua një nga fushëbetejat kryesore të betejës së Tendës së Qypit, ku pushtuesit në shenjë hakmarrjeje për humbjen nuk lanë asnjë shtëpi pa djegur. I lumtur të shihja shtëpi të rindërtuara e toka të punuara me dashuri”, shkruan Presidenti i Republikës.