Stoltenberg: E respektoj dëshirën e Serbisë për mosanëtarësim në NATO
Sekretari i Përgjithshëm i NATO- s, Jens Stoltenberg, tha se Aleanca Veriatlantike mbështet fuqishëm dialogun midis Kosovës dhe Serbisë dhe të gjitha përpjekjet që do të çojnë në uljen e tensioneve dhe zgjidhjen e mosmarrëveshjeve. Stoltenberg ka theksuar në një intervistë televizive, se NATO ka marrëdhënie të shkëlqyeshme me Serbinë dhe se respekton vendimin e Beogradit që Serbia të mos i bashkohet Aleancës Veriatlantike. "Mbështesim fuqishëm dialogun midis Beogradit dhe Prishtinës dhe të gjitha përpjekjet që do të çojnë në uljen e tensioneve dhe zgjidhjen e mosmarrëveshjeve. Ne kemi nevojë për një zgjidhje politike. Ky është një dialog, të cilin me vëmendje e ndjek Bashkimi Europian, kurse NATO ishte pjesë e nismës që çoi në këtë dialog. Ne vazhdojmë të monitorojmë dhe mbështesim dialogun", tha Stoltenberg. Sekretari i Përgjithshëm i NATO- s theksoi se respekton vendimin e Serbisë si një shtet sovran, që nuk dëshiron anëtarësimin në Aleancë. "Ne e respektojmë çdo vendim të një shteti sovran nëse dëshiron të bashkohet me NATOn, ose nuk dëshiron. Ne kemi një marrëdhënie të shkëlqyeshme me Serbinë dhe ne respektojmë vendimin e saj për të mos u bashkuar me NATO- n, por dëshiron të jetë partner. Kjo është mirë për Serbinë, kjo është mirë për NATO- n", tha Stoltenberg.
Ndërkohë, Presidenti serb, Aleksandër Vuçiç, në lidhje me marrëveshjen e mundshme me Kosovës, po përpiqet ta kushtëzojë BE- në. Gjatë një interviste për "Reuters" ai ka thënë se do të kërkojë garanci që vendi i tij do të bëhet pjesë e Bashkimit Europian në vitin 2025, nëse Serbia do të arrijë të nënshkruajë ndonjë marrëveshje me Kosovën. "Përpara se ne të nënshkruajmë një marrëveshje me Prishtinën, Serbia duhet të garantohet se do të bëhet një shtet i Bashkimit Europian në vitin 2025", tha Vuçiç. Ai sqaroi se Beogradi dhe Prishtina mund të arrijnë një marrëveshje, por do të jetë shumë e vështirë, për shkak të dallimeve të shumta që kanë vendet e tyre për 10 vjet. "Ndonjëherë më vjen të qesh kur dëgjoj njerëzit që i thjeshtojnë gjërat aq shumë, saqë madje i kanë vënë edhe një datë të caktuar nënshkrimit të marrëveshjes. Madje, thonë edhe se tre fshatra do të këmbehen me tre", theksoi Presidenti i Serbisë. Vuçiç ka shtuar se nëse do të arrijnë ndonjëherë një marrëveshje me Prishtinën, ajo do të ishte e përgjithshme, që do të përfshijë jo vetëm marrëdhëniet midis tyre dhe shqiptarëve në Kosovë, por do të duhej të përfshijë edhe një rezolutë për avancimin drejt BE- së dhe më tej për zhvillimin ekonomik.