Zhdukja e gazetarit saudit, përfshihet edhe Erdogan
Khashoggi dyshohet të jetë vrarë barbarisht në konsullatën saudite
President i Turqisë, Recep Tayyip Erdogan, tha të dielën se po e ndiqte nga afër çështjen e gazetarit të zhdukur saudit, Jamal Khashoggi, pasi zyrtarët turq besojnë që ai mund të jetë vrarë brenda konsullatës saudite në Stamboll.
Erdogan u tha reporterëve se autoritetet po ekzaminonin pamjet e kamerave dhe të dhënat e lëvizjes në aeroporte për zhdukjen e Khashoggi- t, i cili ka qenë shumë kritik ndaj ligjvënësve në Arabinë Saudite. Ish- redaktor gazete në Arabinë Saudite dhe këshilltar për ish- kreun e saj të Inteligjencës, Khashoggi u largua nga ai vend vitin e kaluar, pas shtoi kritikat mbi politikat e Arabisë Saudite në luftën e Jemenit. Të martën e kaluar ai ka hyrë në konsullatën saudite në Stamboll për të marrë dokumentet mbi martesën e tij të ardhshme. Zyrtarët sauditë thanë se ai është larguar pak pasi ka marrë dokumentet, por e fejuara e tij, e cila po e priste jashtë, tha se ai nuk ka dalë nga konsullata. Dy burime nga Policia turke thanë për “Reuters” se ata besojnë që Khashoggi është vrarë brenda konsullatës, një këndvështrim i njëjtë me një nga këshilltarët e Presidentit Erdogan, Yasin Aktay, i cili është mik i gazetarit saudit. Një tjetër burim për “Reuters” tha se një grup prej 15 sauditësh kanë mbërritur në Stamboll me dy avionë dhe kanë shkuar në konsullatë ditën që ishte edhe Khashoggi atje dhe më pas janë larguar nga Turqia. Autoritetet turke po mundohen t’i identifikojnë ata. Khashoggi besohet se është vrarë në një mënyrë barbare. Kështu ka deklaruar një nga miqtë e tij të dielën, pas bisedimeve me zyrtarë, të cilët e kanë njoftuar që të përgatitet për funeralin. Policia turke zyrtarisht po heton ende zhdukjen e Jamal Khashoggi- t, një kontribuues i “Washington Post” dhe kritik i qeverisë saudite. Ai u pa për herë të fundit të martën e kaluar, duke hyrë në konsullatën e Arabisë Saudite. “Ajo që na është shpjeguar është kjo: Ai u vra, bëni përgatitjet e varrimit”, është shprehur për “Associated Press”, Turan Kislakci, kreu i Shoqatës së Medias Turko- Arabe. “Ata thanë: Ne kemi dëshmi se ai është vrarë në një mënyrë barbare, do ta shpallim këtë publikisht nesër ose pasnesër”, ka shtuar ai, duke iu referuar bisedës me zyrtarë të Policisë turke. Një zyrtar i konsullatës i ka quajtur këto akuza si të pabaza dhe princi i Kurorës Mbretërore, Mohammad bin Salman është cituar të ketë thënë se Policia turke ka lejen e tij për të hyrë e për të kontrolluar konsullatën dhe se ata nuk kanë asgjë për të fshehur.