Laçi zhyt Tiranën, Skënderbeu festë në Gjirokastër
Teuta likuidon Kastriotin me dopietën e Latif
Laçi vazhdon të jetë mrekullia e këtij sezoni. Kurbinasit, në javën e tetë të Superiores fituan ndaj Tiranës në transfertë, brenda në stadiumin "Selman Stërmasi", me shifrat e ngushta 0- 1.
Pjesa e parë nisi me disa tentativa nga të dyja krahët, edhe pse më të pastra ishin ato të kurbinasve, me Xhixhën dhe Shtubinën si rrezik kryesor. Me nisjen e pjesës së dytë, Tirana shtanget në minutën e 51- të, pas një goli të Xhixhës, që u vidhet mbrojtësve brenda zone. Më pas, kurbinasit tërhiqen në mbrojtje dhe Tirana ka iniciativën, edhe pse duket e paqartë në disa sulme. Blazhevski ka rastin e artë në minutën e 83- të, me një penallti të fituar nga Ngo, por maqedonasi humb në mënyrë të pabesueshme, teksa godet totalisht jashtë kuadratit. Një tjetër fitore e rëndësishme për Laçin, që vazhdon të mbetet i pathyer në këtë kampionat dhe ngjitet në vendin e tretë me 16 pikë.
LUFTËTARI- SKËNDERBEU
Skënderbeu tregon forcën në Gjirokastër dhe gdhin i pari, duke e kaluar "presionin" te Partizani dhe Kukësi, që sot do të përballen me njëra- tjetrën në "Elbasan Arena". Korçarët konfirmuan edhe ndaj Luftëtarit se janë një prej ekipeve më të mira në vend, pavarësisht se kanë ndryshuar skuadrën në masën 70% nga sezoni i kaluar. Ardit Hoxhaj dhe Bruno Dita ishin heronjtë e fitores 0- 2 në transfertë, me të dy golat të shënuar në pjesën e dytë. Ka qenë një ndeshje që i kishte brenda të tria rezultatet, paçka se Skënderbeu dominoi lojën dhe mbi të gjitha, kishte diferencë në qarkullimin e topit. Rastin më të mirë në pjesën e parë e patën gjirokastritët me Vasil Shkurtajn, por nuk e shfrytëzuan, ndërsa ekuilibrat u prishën pas minutës së 65të, kur kualitetet e Skënderbeut bënë diferencën në fushë. Forca reaguese e Luftëtarit la për të dëshiruar, me titullarë si Liçaj, Ramadani dhe Shkurtaj, të cilët ishin një zhgënjim më vete.
TEUTA- KASTRIOTI
Në Durrës, dy gola të Amadu Latif u kanë dhënë vendësve tri pikët e radhës, duke bërë që pushimi prej ndeshjeve të Kombëtares të shërbejë për të riparuar dhe jo për të kuruar "plagë". Një ndeshje e nisur mirë për Kastriotin edhe me një rast shënimi me anë të Bardhit, por në fund ka dalë pa pikë. Në fundin e së parës, një harkim pa shumë pretendime në zonën e Kastriotit shndërrohet në penallti, pasi portieri ndërhyn me takë në shpinën e Bicit. Kryesori Bajrama akordon 11metërsh nën asistencën e arbitrit anësor Barushi. Gjuan Latif dhe shënon. Kastrioti shtyn, por në momentin më të mirë, rezultati dyfishohet sërish me Latif. Ky i fundit përfiton, pasi një krosim i gjatë në zonë gjen Hyseinin të pavendosur mirë që nuk largon dhe më tej, portieri nuk kuptohet me mbrojtësin duke lënë sferën në qendër të zonës dhe sulmuesi i Teutës realizon lehtësisht.
KAMZA- FLAMURTARI
Kamza "shtang" Flamurtarin. Një ndeshje e nisur 15 minuta më vonë se të tjerat, për shkak të mungesës së një titullari policie në stadium, përfundoi me një barazim dramatik. Një duel i luftuar, ku nuk munguan rastet, golat, gafat, por edhe "heronjtë". Vlonjatët vazhdojnë të mos tregojnë stabilitet në lojë, ndërsa kamzalinjtë dëshmuan dje se janë një ekip që nuk di të dorëzohet. Loja nis vrullshëm për Kamzën, e cila hidhet në sulm dhe pa kaluar 5 minuta gjen avantazhin me një aksion të rrjedhshëm. Mehmeti i ndodhur në mesfushë, pason nga e djathta për te Frashëri, që në një inkursion shmang bukur Mustën dhe kroson në qendër të zonës ku gjendej Plaku, i cili me kokë nuk fal, 1- 0. Batha insiston në fundore, duke shmangur edhe mbulimin e Orelesit, shërben në qendër për Bushiçin, që pasi fiton dyluftimin me Teqjen, gjuan me të djathtën dhe sjell baraspeshën. Në të 54ën, portieri Koliçi nuk mund të bënte asgjë. Edhe pse grushtoi një goditje nga këndi të Bathës, topi përfundoi te Ribaj që shënjestron kuadratin dhe Musta devijon trajektoren, duke shtyrë sferën në rrjetë dhe 1- 2. Në të 88- ën vjen barazimi. Plaku pason te Zisi në të majtë, ky i fundit shërben në shtyllën e dytë, Pollozhani i ndodhur në pozicion nuk e devijon dot topin dhe Roloviç me portën e boshatisur s'e ka të vështirë që me të majtën të çojë shifrat në 2- 2 dhe të kthejë qetësinë te Kamza.