Basha flet me emra: Banditët që diktojnë zgjedhjet
Basha: Zgjedhjet diktohen nga Bajrajt e Shkodrës, Çelajt në Elbasan, Habilajt në Vlorë, Ymer Lala në Dibër e Rragami në Korçë
Kryetari i opozitës, Lulzim Basha, e sheh të domosdoshëm vetingun e politikës jo vetëm për të shkëputur lidhjet e saj me krimin, por edhe për të realizuar një proces zgjedhor të pandikuar nga partitë e pista dhe influencat e botës së krimit.
Në një mbledhje të përbashkët me grupet parlamentare të opozitës dhe ekspertë zgjedhorë, opozita prezantoi platformën e saj në lidhje me Reformën Zgjedhore. Sipas Bashës, Reforma Zgjedhore duhet të mbështetet në katër shtylla kryesore, ku më e rëndësishmja është ajo e dekriminalizimit të zgjedhjeve. Për opozitën, ky proces duhet të nisë me vetingun në politikë dhe pastrimin e lidhjeve të Policisë me krimin. "Dekriminalizimi i procesit zgjedhor - Vetting i politikës- pastrimi i Policisë së Shtetit nga lidhjet me krimin. E kuptoni se nga kush administrohej procesi zgjedhor? Krerët e Policisë, palë me krimin, trafikun dhe mbjelljen e drogës, njerëz me zero besueshmëri publike dhe Rama, i cili një vit më parë i bënte thirrje Policisë të mblidhte vota për Rilindjen", tha Basha. Sipas kreut të PD, duhet të ndërpriten financimet private të zgjedhjeve për të ndalur paratë kriminale që hidhen në fushatë. Opozita propozon që fushatat zgjedhore të financohen 100% nga shteti. "Financim shtetëror 100% të procesit zgjedhor dhe fushatës së partive. Kriminalizim të financimeve private. Kompani që financojnë parti politike dhe kandidatë do të përjashtohen nga përfitimi i tenderave dhe koncesioneve për një kohë të përcaktuar", sqaroi kreu i PD. Basha i denoncoi me emra lidhjet e max- horancës me krimin në çdo qytet të vendit, duke theksuar se Policia dhe Prokuroria kanë biseda telefonike mes zyrtarëve të lartë të PS me përfaqësues të botës së krimit. "Në Polici dhe në Prokurori ka regjistrime telefonatash dhe mesazhesh telefonike mes Vangjush Dakos dhe grupeve kriminale, mes Ulsi Manjës dhe grupeve kriminale, mes Damian Gjiknurit dhe grupe- ve kriminale, mes Taulant Ballës dhe grupeve kriminale dhe mes Edi Ramës e kriminelëve më famëkeq të vendit, të gjithë të regjistruar në pazare votash me kriminelë, duke iu premtuar atyre mbrojtje për aktivitetet kriminale. Zgjedhjet diktohen nga Bajrajt e Shkodrës, kriminelë të rrezikshëm ndërkombëtarë, në Elbasan nga Çelajt e Sanxhaktarët me shokë dhe Taulant Ballës e Qazim Sejdinit, në Durrës, bandat qeverisin bashkinë e Vangjush Dakos, në Vlorë nga Habilajt te Xhafaj, në Dibër Ymer Lala, në Korçë Rragami", theksoi kreu i PD- së.
ZGJEDHJET
Opozita e sheh përdorimin e teknologjive në zgjedhje si të vetmen mundësi për të ndalur manipulimet dhe depërtimin e krimit në çdo qendër votimi në zgjedhje. "Identifikimi biometrik, votimi dhe numërimi elektronik. Të gjitha këto janë të rëndësishme për të trajtuar vdekjen e procesit zgjedhor, shkatërrimin e procesit zgjedhor dhe kthimin e tij nga një festë të demokracisë në një gosti dhe orgji të krimit të lidhur me politikën", tha Basha. Kreu i PD- së theksoi se vetëm pasi të jenë plotësuar këto kushte, mund të hapen diskutimet për ndryshimin e sistemit, për të cilin ai nuk e fshehu alternativën e tij. "Qëndrimi im personal është që për çfarëdo sistemi të shkojmë, maxhoritar, proporcional, proporcional kombëtar, duhet një diskutim i hapur dhe i thelluar për të arritur në mënyrën më të mirë përfaqësimit të vullnetit të qytetarëve. Reduktim i numrit të deputetëve me 100? Pse jo. Parlamenti me dy dhoma, për një kontroll dhe balancim më të mirë të pushteteve", deklaroi kreu i opozitës.