BiznesAlbania: Të hiqet taksa e ambalazhit, për pullat të ulet
"Të ulet TVSH- ja e bukës dhe çmimi i energjisë për biznesin"
Presidenti i BiznesAlbania, Luan Bregasi, prezantoi dje gjatë një konference për shtyp propozimet e sipërmarrjes dhe shoqatave të biznesit për paketën fiskale të vitit 2019.
Kreu i BiznesAlbania u shpreh se propozimet e dërguara Ministrisë së Financave synojnë rritjen e konkurrueshmërisë së prodhimeve vendëse me ato të rajonit dhe Bashkimit Europian. Presidenti i BiznesAlbania u ndal në propozimet e prodhuesve vendës, që nga heqja e taksës së ambalazhit plastik dhe të qelqit, ulja e taksës së pullave fiskale, energjisë elektrike dhe ujit. "Pjesën qendrore të propozimeve e bëjnë prodhuesit vendës. Nga llogaritë që kanë bërë të gjitha shoqatat rezulton se shumë shoqëri prodhuese nuk janë konkurrente në treg, për shkak të ngarkesës së madhe të taksave që kanë. Propozimi është të hiqet taksa e ambalazhit plastik dhe të qelqit. Arsyeja e parë është se këto janë produkte të riciklueshme dhe sipas direktivave të Komisionit Europian, të gjitha ambalazhet e riciklueshme nuk kanë taksë. Në Shqipëri shumë industri kanë veçorinë që pjesën më të madhe të ambalazhit e kanë të kthyeshëm. Pra, nëse është i kthyeshëm nuk duhet të paguhet akciza, e cila zë një peshë shumë të madhe, është mbi 33 për qind e kostos së prodhimit vendës. Për taksën e pullave fiskale është propozuar të qëndrojë si taksë, por nga 28 euro të bëhet 3 euro për 1 mijë copë dhe diferencën në rast se shteti ka detyrime për koncesionarin, ta paguajë shteti. Së katërti, çmimi i energjisë për të gjithë industrinë vendëse është shumë i lartë. Ne jemi të ndërgjegjshëm se kur pranuam rritjen e çmimit të energjisë humbjet në rrjet ishin 45 për qind deri në 50 për qind. Tashmë, për shkak të investimeve të kryera nga OSHEEja humbjet në rrjet janë ulur, në 20 deri në 25 për qind. Pra, kjo është një arritje shumë e madhe, çka do të thotë që mundësitë për të ulur çmimin e energjisë ekzistojnë. Të paktën të ulen në nivelin e asaj që është rifituar për shkak të uljes së humbjeve në rrjet. Në krahasim me vendet e rajonit, çmimi i energjisë elektrike është dyfish më i lartë. Në këto kushte, për shumë njësi tonat është më mirë të prodhojnë në rajon sesa në Shqipëri, sepse produktet e rajonit vijnë me çmime më të ulëta në vend, sesa produktet tona. Çmimi i ujit për industritë vendëse është 200 për qind më i lartë se në vendet e rajonit. Si mund të konkurrojnë disa prodhues me produkte që vijnë nga Kosova apo Mali i Zi, kur çmimi i ujit në këto vende është 200 herë më i lirë se në Shqipëri", u shpreh Bregasi. Po ashtu, Bregasi prezantoi edhe kërkesën e shoqatave të prodhuesve të bukës për uljen e TVSH- së së bukës në 10 për qind dhe tolerim nga Tatimet në gabimet me shtypjen e kasës fiskale. Shoqata e siguruesve, sipas kreut të BiznesAlbania kërkon ulje të primit të sigurimit nga 10 për qind në 2 për qind.