Tkurren universitetet, degët që rrezikojnë mbylljen
Fati i tyre, në varësi të regjistrimeve në raundin e tretë
Përveç "Aleksandër Moisiut" të Durrësit, të gjitha universitetet në rrethe të tjera nisin vitin e ri akademik me firo. Rreth 40 programe studimi pritet të mos çelen për shkak të mosplotësimit të kuotës minimale prej 10 studentësh. Ndonëse të dhënat janë transparente në portalin u- albania, organizata Qëndresa Qytetare është ajo që ka analizuar të gjitha degët ( tabela përbri), të cilat në përfundim të raundit të dytë kanë dhjetë ose më pak të regjistruar e që rrjedhimisht rrezikojnë të mos hapen. "Eqerem Çabej" në Gjirokastër vijon të jetë më i rrezikuari. Nga 23 degë në total, 14 prej tyre kanë nga 0 në 9 studentë në postraundin e dytë të regjistrimeve.
RAUNDI I TRETË E vetmja shpresë për universitetin e po ashtu edhe për studentët tashmë të regjistruar në programet në prag mbylljeje është raundi i fundit i regjistrimeve. Këtë vit, Ministria e Arsimit ka bërë një lëshim, duke lënë plotësimin e kuotave në rende të lirë. Të gjithë maturantët që mbetën jashtë dyerve mund të regjistrohen nga sot deri më 13 tetor, direkt në sekretarinë e fakultetit që ka kuota të lira ( nga ato që aplikuan në raundin e dytë). E në rast se konstatohen ende vende bosh, plotësohen nga dekanët e fakulteteve sipas kërkesave të depozituara nga 15- 18 tetori. Vetëm në datën 21, kur përfundojnë regjistrimet për këtë vit, mund të thuhet nëse ka vend për alarm.
MËSUESIA Pragu minimal i notës mesatare 7, për të aplikuar në një degë mësuesie që u aplikua nga ky vit, duket të ketë penalizuar shumë profile në rrezik. "Gërshërët" kanë prekur më shumë universitetin e Gjirokastrës me profilet: Biologji- Kimi, Histori- Gjeografi, Matematikë- Informatikë, Gjuhë- Letërsi Shqipe, Mësuesi për Arsimin Parashkollor, Matematikë- Fizikë, Fizikë dhe Teknologji Informacioni, ndërsa në Korçë mbyllet Arsimi Parashkollor dhe Filozofi- Sociologjia. Në Shkodër pritet t'u vihet kyçi Gjuhës Italiane, Historisë, Pedagogjisë Muzikore, Gjuhës Frënge dhe Pikturë e Grafikë, ndërsa në Elbasan nuk do të dalë asnjë mësues për gjuhën e huaj. E veç kësaj, edhe për Edukimin Qytetar, Matematikë- Fizikë, Biologji- Kimi, Filozofi- Sociologji dhe Fizikë Kompjuterike. Përpjekjet e Ministrisë së Arsimit për mësues cilësorë duket se do ta lënë vendin pa ta. Së paku, për arsimin parashkollor e fillor, degë të cilat nuk figurojnë fare në universitetet e kryeqytetit.