Atentat në Lushnjë, vritet para shtëpisë kryeplaku
U përfshi në konflikte pronësie para 10 vitesh kur ishte kryeplak
Ekzekutohet 100 metra larg shtëpisë ish- kryeplaku, dyshohet për shkak të përfshirjes në një konflikt pronësie.
Një ngjarje e rëndë ka ndodhur mbrëmë vonë në fshatin Shegas të Lushnjës. Viktimë ka mbetur Qamil Alla, me profesion fermer dhe pronar i një dyqani fidanishteje. 48- vjeçarit i kanë bërë pritë dy persona ende të paidentifikuar, me breshëri kallashnikovi, vetëm pak metra larg banesës duke e lënë të vdekur. Policia bëri të ditur se viktima ka qenë i vetëm teksa po kthehej në banesë me makinë, kur u qëllua me disa plumba nga një distancë e afërt dhe ka marrë dëmtime në pjesën e fytyrës. Krismat kanë vënë në alarm familjarët, por edhe fqinj të tij, të cilët kanë dalë menjëherë dhe e kanë gjetur 48- vjeçarin të vrarë brenda në makinë. "Rreth orës 21: 45, në fshatin Shegas, Lushnjë, duke udhëtuar me mjetin e tij, rreth 100 m para se të mbërrinte te banesa, është qëlluar me armë zjarri shtetasi Q. H, 48 vjeç, i cili ka gjetur vdekjen. Shtetasi Q. H ishte fermer dhe nuk njihet si person me precedent kriminal. Ekspertë të Hetimit të Krimit po hetojnë mbi shkakun dhe zbardhjen e rrethanave ende të paqarta", bëri të ditur mbrëmë Policia e Shtetit. Mësohet se në ndihmë të grupit hetimor kanë shkuar një grup ekspertësh të Hetimit nga Drejtoria e Përgjithshme e Policisë së Shtetit. Menjëherë pas krimit të rëndë, në vendngjarje mbërritën forca të shumta Policie nga Komisariati i Lushnjës, Drejtoria Vendore e Policisë Fier dhe FNSH Fier. Ata vendosën pika të shumta kontrolli dhe krehën zonën për kapjen e dy au- torëve. Por, deri në orët e vona, nuk kishte asnjë person të ndaluar si të dyshuar. Grupi hetimor dyshon se vrasja mund të ketë lidhje me detyrën e tij si kryeplak, që ka mbajtur para 10 vitesh, kur edhe është përfshirë në zgjidhjen e disa konflikteve pronësie mes fermerëve. Por, nga ana tjetër, nuk përjashtohet mundësia që ekzekutimi të ketë lidhje dhe me dyqanin e fidanishtes dhe mund të jetë vrarë për shkak të konkurrencës. Policia ka marrë në pyetje familjarë të viktimës, por ata nuk kanë konfirmuar ndonjë konflikt, çka mund të orientonte Policinë drejt një piste që do t'i çonte edhe në identifikimi e autorëve. Policia bëri të ditur se të dyja pistat mbeten të hapura dhe njëkohësisht po hetohet për ndonjë konflikt që mund të ketë pasur kohët e fundit 48- vjeçari.