Studentët braktisin Vlorën, 3 degë rrezikojnë mbylljen
Kimia, Matematika e Fizika nuk kanë asnjë të regjistruar
Studentët braktisin Fakultetin e Shkencave Ekzakte dhe tri degë në Universitetin e Vlorës “Ismail Qemali”, rrezikojnë të mbyllen.
Kur kanë mbetur dhe pak ditë nga nisja e vitit akademik, që pritet të nisë më 15 tetor, tre degët, Kimi, Matematikë dhe Fizikë rrezikojnë të mos çelen. Kjo pasi deri tani nuk ka pasur asnjë kërkesë për regjistrime. Kur ka mbetur dhe një fazë regjistrimi, në këto degë nuk ka pasur preferenca, çka do të thotë se do të vijohet vetëm në vitin e dytë dhe të tretë të tyre. Nga ana tjetër, thuhet se regjistrimet në Universitetin “Ismail Qemali” për raundin e tretë do të vijojnë deri në datë 19 tetor, çka do të thotë se ka ende shpresë. Por referuar interesimit të deritanishëm, në degët Kimi, Matematikë dhe Fizikë nuk do të ketë asnjë student për këtë vit akademik. Për çeljen e një dege, duhen minimalisht 10 studentë të regjistruar, por referuar interesimit që kanë treguar deri më tani maturantët, shpresa për çeljen në vitin e parë të këtyre degëve duken minimale. Bëhet fjalë për tre degë që edhe vitin e kaluar akademik kanë pasur shumë pak kërkesa, ndërsa këtë vit, këto degë në vitin e tyre të parë nuk do të çelen. Lajmin e ka konfirmuar dhe rektori Roland Zisi, edhe pse ai shpreson në raundin e tretë të regjistrimeve, i cili mbyllet në datë 19 tetor. Pjesa më e mirë e studentëve kërkojnë të regjistrohen në Universitetin e Tiranës, teksa preferencë të tyre të parë kanë një nga degët në këtë universitet, ndërsa Vlora mbetet zgjedhje e dytë e tyre. Nëse nuk arrijnë të përfitojnë një të drejtë studimi në Tiranë, atëherë zgjedhin Vlorën, por preferencat janë kryesisht në Drejtësi, Administrim Biznesi apo Infermieri. Janë këto tre degët me më shumë preferenca në universitetin “Ismail Qemali” të Vlorës. Përveç tri degëve që rrezikojnë të mos çelen për këtë vit akademik, Universiteti i Vlorës këtë vit ka pasur nga 10 deri në 20% më pak të regjistruar në shumë prej degëve të tij.