Nikki Haley nuk do të përfaqësojë më SHBA- të në OKB
Nikki Haley nuk do të jetë më ambasadorja e SHBA në OKB vitin e ardhshëm, pasi ka dorëzuar dorëheqjen te Presidenti Donald Trump. Ajo do të qëndrojë në detyrë deri në fund të vitit. Trump e ka pranuar dorëheqjen e saj. Të ulur krah për krah në Zyrën Ovale, Trump e vlerësoi Haley si një person fantastik që ka bërë një punë të pabesueshme. Ai tha se me kënaqësi do të mirëpriste kthimin e saj në administratën e tij. “Ajo ka bërë një punë fantastike dhe ne kemi bërë një punë fantastike së bashku. Ne kemi zgjidhur shumë probleme dhe ne jemi në procesin e zgjidhjes së shumë problemeve”, u shpreh Presidenti. Trump tha se Haley ka qenë shumë e veçantë për të dhe e ka lavdëruar si një person që i kupton gjërat. Ai tha gjithashtu se Haley mund të zgjidhte ndonjë post në administratë nëse ajo ndonjëherë vendos se dëshiron të bashkohet me administratën e tij. Brenda dy apo tri javësh, Trump do të emërojë dikë tjetër për postin e lartë diplomatik të SHBA në Kombet e Bashkuara. Ndërsa Haley tha se “ka qenë nderi i tërë jetës së saj që shërbyer si ambasadore e OKB- së”, por shtoi se ishte koha për t’u larguar nga administrata. “Nuk ka arsye personale”, theksoi ajo, duke shpjeguar pse po largohet. “Është shumë e rëndësishme për zyrtarët qeveritarë që të kuptojnë se kur është koha për të dalë mënjanë. Unë dua të siguroj që administrata, ky President, ka personin më të fortë për të luftuar”, tha ajo. Haley ka vlerësuar edhe anëtarët e ekipit të Trump, duke përfshirë këshilltarët e lartë Jared Kushner dhe Ivanka Trump. “Jared është një gjeni kaq i fshehur, që askush nuk e kupton. Ne jemi një vend më i mirë për shkak se ata janë në administratë”, tha ajo. Haley ka qëndruar rreth një vit e gjysmë në administratë.