Hakmarrje se e hoqi nga puna, i djeg makinën drejtoreshës
Policia arreston Alket Rumanon për zjarrvënien në Kombinat
Policia e Tiranës ka arrestuar një 46- vjeçar, si autor të djegies së makinës së drejtoreshës së Qendrës Sociale, Mimoza Agalliu, ngjarje e ndodhur në Kombinat, 10 ditë më parë.
I dyshuari është shtetasi Alket Rumano, dikur punonjës i Qendrës që drejtohej nga Agalliu dhe, sipas Policisë, e ka realizuar ngjarjen si hakmarrje për pushimin nga puna. Ai është arrestuar nga oficerët e Komisariatit nr. 6, pas një pune intensive hetimore. Ndonëse edhe vetë i dyshuari kishte paraqitur dorëheqjen më përpara, duke qenë se nuk kishte marrëdhënie të mira me drejtoreshën, në momentin që ajo e ka shkarkuar, ai është hakmarrë, duke i vënë flakën makinës së saj. Ngjarja për të cilën akuzohet 46- vjeçari Alket Rumano, ka ndodhur gjatë natës së datës 1 tetor, në rrugën "Hamdi Cenoimeri", në Kombinat. Drejtoresha Mimoza Agalliu kishte parkuar makinën tip "Benz", me targë AA 550 TN, para pallatit ku banon dhe gjatë natës është lajmëruar nga fqinjët se mjeti i saj ishte përfshirë nga flakët. Menjëherë, në vendin e ngjarjes kanë shkuar shërbimet e Policisë dhe ato zjarrfikëse, që kanë bërë të mundur shuarjen e zjarrit, ndërsa nisën hetimet për zjarrvënie të qëllimshme. Policia e Tiranës, bashkë me njoft- imin zyrtar për arrestimin e autorit të dyshuar, publikoi edhe një video të filmuar nga kamerat e sigurisë pranë vendit ku ndodhi ngjarja. Nga pamjet duket autori i dyshuar, tashmë i arrestuar, i veshur me rroba të errëta dhe me kapuç, që i afrohet makinës duke ecur në rrugicat mes bllokut të pallateve në rrugën "Hamdi Cenoimeri". Pasi sheh makinën e parkuar, ai hap tapën e një bidoni benzine që kishte në dorë dhe spërkat makinën nga sipër dhe në anën e djathtë. Më pas, duke u larguar pak nga automjeti i parkuar, i hedh një fije shkrepëse të ndezur dhe mjeti merr flakë menjëherë. Në këtë kohë, 46- vjeçari shfaqet në kamera duke u larguar me vrap nga vendi i ngjarjes.