"Vendi sundohet nga bandat", Xhafaj: Gënjeshtra e radhës, shpifje bajate
Ministri i Brendshëm, Fatmir Xhafaj, ka reaguar sërish përmes shifrave përballë akuzave të kreut të PD- së, Lulzim Basha. Në një postim në "Facebook", Xhafaj sqaron se pretendimet e Bashës për një Shqipëri të sunduar nga bandat është gënjeshtra e radhës. Sipas ministrit të Brendshëm, pretendimet se bandat kontrollojnë lagjet dhe ekonominë shqiptare janë të pavërteta. "Basha, dje: ' Shqiptarët sundohen nga bandat, të cilat kontrollojnë fizikisht lagjet, qendrën, lokalet luksoze, territorin, ekonominë, ato pikat e bixhozit, ekonominë, hotelerinë, restorante, turizëm, kontrollojnë pushtetin, të gjithë pushtetin'. Kjo ishte GËNJESHTRA e radhës!", shkruan Xhafaj. Ministri i Brendshëm, njësoj si një ditë më parë, reagimin e tij për media e ka shoqëruar me tabela ku tregon rënien e nivelit të vjedhjeve me armë dhe dhunë, duke e krahasuar me kohën kur Basha ishte në krye të Ministrisë së Brendshme. Sipas Xhafajt, traumat e së kaluarës në perceptimin e pranimin e të vërtetave, po kushtëzojnë kreun e opozitës. "Deklaratë pa sens e minimum logjike. Ky takëm politikanësh fatkeqësisht e kanë mbështetur të ardhmen mbi akuza të pavërteta e shpifje bajate! Traumat e së kaluarës në perceptimin e pranimin e të vërtetave, po kushtëzojnë kreun e opozitës. E VËRTETA në shifra! Imazhe sa 1000 fjalë!", shprehet ministri Xhafaj në "Twitter". Ministri i Brendshëm është vënë sërish në qendër të akuzave nga opozita për shkak të audiopërgjimeve të publikuara muaj më parë nga PD. Prokuroria i ka cilësuar të manipuluara materialet e servirura në publik nga PD, por opozita ka paraqitur prova të tjera, sipas të cilave vëllai i ministrit Xhafaj implikohet sërish. Edhe një ditë më parë, Xhafaj i cilësoi të pavërteta pretendimet e Bashës, duke e cilësuar këtë të fundit si ministrit më të paaftë që ka drejtuar Ministrinë e Brendshme. "Ju parashtroj... një çështje kapitale, emergjence kombëtare, siç është gjendja e rendit e shpartallimit të plotë të institucioneve të zbatimit të ligjit! Një E PAVËRTETË e madhe, dalë nga goja e ish- ministrit të Brendshëm më të paaftë në vite", deklaroi Xhafaj.