Afat i ri për regjistrimin e pronave në Hipotekë, shuhen kamatëvonesat

Për regjistrimin e titujve të pronësisë, qytetarët do të kenë afat 30 ditë nga hyrja në fuqi e këtij ligji. "Të gjithë subjektet që gëzojnë një titull pronësie apo të drejte tjetër reale të fituar në përputhje me ligjin dhe të regjistrueshëm në regjistrat publikë sipas nenit 193 të Kodit Civil dhe që nuk kanë aplikuar për regjistrim pranë Zyrave të Regjistrimit të Pasurive të Paluajtshme brenda afatit ligjor, rivendosen në afat për aplikim të dokumentit, për 30 ditë, duke filluar nga data e hyrjes në fuqi të këtij ligji", thuhet në nenin 61 të draftit. Me anë të kësaj nisme ligjore, Qeveria shuan edhe kamatëvonesat e krijuara, duke iu dhënë mundësinë qytetarëve që të çlirohen nga detyrimet e mbartura financiare për shkak të mosaplikimit në kohë. "Të gjitha kamatëvonesat që janë gjeneruar nga sistemi i regjistrimit të pasurive të paluajtshme deri në hyrjen në fuqi të këtij ligji për shkak të mosaplikimit në kohë për regjistrim të dokumentacionit, sipas nenit 39 të ligjit nr. 33/ 2012 ' Për regjistrimin e pasurive te paluajtshme", të ndryshuar, shuhen. Subjektet që aplikojnë brenda afatit të parashikuar në pikën 1 të këtij neni, paguajnë vetëm tarifën aktuale për regjistrimin e aktit". Nga ana tjetër, edhe procedimet administrative të papërfunduara të Komisioneve Vendore, për verifikimin e titujve mbi tokën bujqësore, pushohen. Nga 1 janari 2019, do të jetë Agjencia Shtetërore e Kadastrës, institucioni që do të ketë në ngarkim këtë proces në sajë të një faze të re inventarizimi dhe verifikimi në terren.