Transporti rrugor, ulet në 10% TVSH për autobusët elektrikë
Paketa e re fiskale parashikon uljen në 10 për qind të TVSHsë për importin e autobusëve elektrikë të transportit publik nga 20 për qind që paguhet aktualisht me qëllim mbrojtjen e mjedisit nga ndotja. "Transporti rrugor është një kontribuues mjaft i madh i ndotjes së ajrit dhe mjedisit. Pikërisht, kjo ndotje e madhe çon në kërkimin e të ashtuquajturit ' Transport të gjelbër', që do të thotë çdolloj praktike e transportit apo automjet, që është eko- miqësore dhe që nuk ka ndikim negativ në mjedis. Një nga mënyrat e transportit të gjelbër është e lidhur pikërisht me transportin publik me autobus, nëpërmjet zëvendësimit të autobusëve me naftë me autobus elektrikë. Me qëllim futjen dhe nxitjen e përdorimit të autobusëve elektrikë në ofrimin e shërbimit të transportit publik të udhëtarëve, propozohet që furnizimi i tyre të mos trajtohet me shkallën standarde të TVSH- së 20 për qind, por të aplikohet një shkallë e reduktuar prej 10 për qind", shpjegohet në relacionin e draftit të qeverisë. Për ndryshimet që qeveria sjell në ligjin për TVSh- në, duke përfshirë edhe përjashtimin nga TVSH- ja e importit të lëndëve të para për fabrikat e prodhimit farmaceutik, të makinerive bujqësore si dhe të furnizimit të nënkontraktorëve për kontraktorët në industrinë fason, efektet në të ardhurat e buxhetit do të jenë negative. "Miratimi i këtij projektligji paraqet efekte buxhetore, të cilat përafërsisht vlerësohen në masën minus 300 milionë lekë, por që parashikohet të sjellë efekte pozitive në zhvillimin e sektorëve që preken nga parashikimet e tij", thuhet në draft.