Universitetet, lehtësohet procedura në raundin e III
Kusht, aplikimi në formularin A1- A1Z e mesatarja mbi 6
Aplikimi në raundin e dytë të garës nuk është kusht për të fituar universitetin.
Në fund të lojës, Ministria e Arsimit ka bërë një ndryshim në udhëzimin e pranimeve për raundin e tretë, duke iu dhënë mundësi të gjithë atyre, që nuk kanë aplikuar në dy raundet e para. Mjafton të përmbushin kriterin e notës mesatare dhe të kenë shlyer detyrimet e Maturës Shtetërore. “Për maturantët që nuk kanë arritur të aplikojnë në raundin e parë dhe raundin e dytë, të cilët kanë plotësuar formularin A1/ A1Z dhe respektojnë kriterin e notës mesatare, sipas vendimit nr. 216, datë 20.04.2018 të Këshillit të Ministrave, mund të bëhen pjesë e raundit të tretë, pasi të kenë aplikuar në portalin u- albania, duke ndjekur procedurën e parashikuar në pikën 5, germa A, kreu III i këtij udhëzimi”, thuhet në udhëzimin e ri. Kështu, të gjithë ata, që nuk duan ta humbin shansin e studimeve në universitet në një nga programet që ka ende kuota të lira, mund të aplikojnë brenda një jave, sipas përcaktimeve në fuqi. “Kjo procedurë të kryhet brenda datës 18 tetor 2018, pasi të jetë kryer më parë konfirmimi në por- talin u- albania na institucionet e arsimit të lartë, ku këta maturantë janë të interesuar të studiojnë”. Raundi i tretë është edhe e vetmja fazë ku universitetet kanë dorë në përmbushjen e numrit të studentëve në programet e ofruara. Në rast se konstatohen ende kuota bosh, edhe pas nisjes së vitit të ri akademik do të mund të bëhen pranime të reja. Mjafton një kërkesë në fakultetin përkatës për të aplikuar. E sigurisht edhe në këtë moment nuk do të mungojë rankimi nga dekanati, nëse ka më shumë aplikues se kuota. Raundi i tretë është shansi i fundit që presupozohet të ezaurojë të gjitha dëshirat e maturantëve, që duan të vijojnë një shkollë të lartë.