Trafiku i 613 kg kokainë, Çekaj nuk do ekstradohet
Xhafaj: S'është më çështje ekstradimi, por hetim i përbashkët
Arbër Çekaj, pronari i firmës "Arbri Garden", ku u sekuestrua kontenieri me 613 kg kokainë në magazinat e kësaj kompanie në Maminas, i arrestuar në Gjermani më 4 maj të këtij viti, nuk do të ekstradohet në Shqipëri.
Të paktën këtë la të kuptohet dje ministri i Brendshëm Fatmir Xhafaj, i cili tha se tashmë ka një ndryshim në këtë çështje. Sipas tij, nuk është më çështje ekstradimi, por çështje hetimi të përbashkët me autoritetet gjermane. Deklarata e Xhafajt erdhi pas takimit që ai pati me Peter Henzler, zv. president i Zyrës Federale Kriminale të Gjermanisë, pasi vizituan zyrat e Task- Forcës Speciale. I pyetur nga gazetarët se në çfarë faze janë procedurat për ekstradimin e Arbër Çekajt në Shqipëri, Xhafaj tha se: "Ka një ndryshim në këtë gjë, nuk është çështje ekstradimi më, por është çështje hetimi të përbashkët. Mbetemi këtu se kjo nuk më takon mua, u takon autoriteteve të hetimit të Prokurorisë së Krimeve të Rënda, Policisë shqiptare dhe zyrës përkatëse të Policisë Kriminale gjermane". Pesë muaj më parë, Policia e Shtetit njoftoi se Çekaj ishte arrestuar nga autoritetet gjermane me qëllim ekstradimi drejt vendit tonë. Por më vonë, burimet thanë se edhe autoritetet në Gjermani kishin nisur një hetim për trafikim ndërkombëtar droge dhe ekstradimi mund të vonohej deri në përfundim të hetimeve. Ndërsa dje, pas deklaratës së Xhafajt, duket se nuk bëhet më fjalë për vonesa procedurash, por Arbër Çekaj nuk do të ekstradohet.
HETIMI NE GJERMANI
Trafikimi nga Kolumbia i një sasie prej 613 kilogramësh kokainë në një kontenier me banane në mars të këtij viti, nuk do të mbyllet vetëm me hetimin e autoriteteve shqiptare. Pronari i firmës "Arbri Garden", që kishte porositur ngarkesën, po hetohet tashmë edhe në Gjermani në lidhje me linjën e trafikut, ngarkesën rekord të drogës, por edhe nëse është i përfshirë në raste të tjera të trafikut ndërkombëtar të kokainës. Prej 5 muajsh, Arbër Çekaj është arrestuar në Gjermani dhe po mbahet në qeli, pasi Prokuroria e Krimeve të Rënda në Shqipëri e shpalli në kërkim ndërkombëtar pas caktimit të masës së sigurisë "arrest me burg" në mungesë. Por, edhe pse u arrestua në bazë të urdhër- kërkimit ndërkombëtar të lëshuar nga Sh- qipëria, ekstradimi i tij u shty pa ndonjë afat të caktuar, derisa erdhi konfirmimi që nuk do të ketë ekstradim. Kjo, për arsye se autoritetet gjermane kanë nisur një hetim për Çekajn edhe për llogari të tyre. Prokurorët gjermanë kanë dyshime se një pjesë e kokainës së kapur në Portin e Durrësit kishte si destinacion final disa vende të BE- së, mes tyre edhe Gjermaninë.