Ruçi: Dritëro Agolli i dhuroi fisnikëri sallës së Parlamentit
“Askush nuk mund ta konkurrojë Agollin si politikan”
Kryetari i Kuvendit të Shqipërisë, Gramoz Ruçi, mori pjesë në festën e 87vjetorit të Dritëro Agollit, në Menkulas të Devollit.
Në fjalën e tij përpara të pranishmëve, Ruçi vlerësoi rolin e shkrimtarit qoftë në fushën politikë, qoftë në atë të letrave shqipe.
Duke folur për figurën e Dritëro Agollit si politikan, Ruçi tha se ai është ndër deputetët më jetëgjatë, që kontribuoi në reformimin e Partisë Socialiste, duke e kthyer në një forcë demokratikë të majtë. “Por edhe nëse dikush shpreson se mund ta konkurrojë Dritëronë si politikan, përsëri e ka të vështirë, madje të pamundur. Sepse Dritëroi është deputeti më jetëgjatë, rreth 30- vjeçar, në të dy kohërat dhe rrallëkush si Ai i dhuroi fisnikëri sallës së mërzitshme të Parlamentit. Sepse shkrimtari dhe politikani Dritëro u ngjizën në simbiozë dhe rrallëkush si Ai guxoi që me veprën e vet të na tregojë ‘ Shqipërinë alternative’, si nën monizëm, ashtu edhe në demokraci. Sepse Dritëroi është borizani që u priu socialistëve shqiptarë drejt shndërrimit në një forcë politike e demokratike të majtë dhe e inspiroi atë të bëhet partia më progresiste e vendit”, theksoi Ruçi.
Në vijim të fjalës së tij, kryetari i Kuvendit të Shqipërisë vlerësoi Dritëro Agollin si shkrimtarin e papërsëritshëm shqiptar. “Nëse dikush mendon se mund ta arrijë Dritëronë si shkrimtar dhe poet, kjo nuk mund të ndodhë. Sepse talenti, krijimtaria dhe imagjinata e tij nuk njohin kufij dhe janë të pashokë. Sepse ai e bëri të pavlefshëm parimin se i gjalli nuk mund të shndërrohet në legjendë. Dritëroi u bë shenjt i botës së letrave shqipe. Nëse dikush mendon se mund ta arrijë Dritëronë si shkrimtar dhe poet, kjo nuk mund të ndodhë”, tha Ruçi.