Meta, në Curraj të Epërm: U dhatë mësim institucioneve me investimin për rrugën
"Do bashkëpunoj që rruga të jetë me standarde, të zgjidhen problemet e telefonisë dhe të hapen më shumë bujtina"
Presidenti i Republikës, Ilir Meta, ka marrë pjesë në përurimin e rrugës së re që lidh Lekbibajn me Currajn e Epërm në Tropojë.
Kreu i shtetit vlerësoi iniciativën e marrë nga vetë banorët e zonës, të cilët me kontribute personale investuan për ndërtimin e rrugës në një nga fshatrat më të bukur të Alpeve shqiptare. Meta u shpreh shumë i lumtur për vizitën e tij në Curraj të Epërm, në Nikaj- Mërtur dhe në Tropojën epike. "Jetojmë në kohë të vështira, kur globalizimi, komercializimi po godasin disa vlera të rëndësishme të familjes, të atdheut, të kombit dhe ne si një vend i vogël jemi të rrezikuar në rast se nuk u kushtojmë rëndësi të madhe këtyre vlerave. Kjo vepër është rikthimi i të gjithëve ju me shumë dashuri e krenari në vendin tuaj e të parëve tuaj. Është një mesazh i fortë atdhedashurie, por njëkohësisht edhe rimëkëmbjeje. Duke falënderuar edhe kryetarin e Bashkisë Tropojë, Besnik Dushajn, për punën, angazhimin si edhe frymën e bashkëpunimit me institucionet, ipeshkvin Simon Kulli për meshën dhe mesazhet pozitive dhe të gjithë kontribuuesit dhe dhuruesit e tjerë brenda e jashtë vendit për rrugën e përuruar, Presidenti i Republikës vuri në dukje se: "Kjo vepër e jashtëzakonshme është një investim tepër bujar, patriotik e njerëzor i vetë banorëve të kësaj zone, duke u dhënë një mësim përfaqësuesve të institucioneve, që shteti duhet të bëjë më shumë", tha Presidenti Meta.
TURIZMI Duke përmendur rëndësinë e turizmit, kreu i shtetit vlerësoi dhe u shprehu mirënjohjen turistëve, sidomos të rinjve, të cilët me mesazhin e tyre të fortë në media kanë theksuar se Shqipëria është një vend me një bukuri të rrallë natyrore, e pacenuar dhe e padëmtuar. "Do të bashkëpunoj shumë më ngushtë edhe me kryetarin e bashkisë, me administratorin, me deputetin e me të gjithë ju, në mënyrë që t'i zgjidhim hap pas hapi të gjitha problemet që ka kjo zonë, që kjo rrugë të jetë e standardeve të duhura dhe njëkohësisht të zgjidhim problemet e telefonisë e të komunikimit, të energjisë e shumë çështje të tjera, të cilat do të bëjnë të mundur që sikurse u hap kjo rrugë, të hapen edhe këto shtëpi e të mirëmbahen. Që këtu të kemi më shumë bujtina e më tepër turizëm, të ardhura e më shumë fëmijë. Kjo është shumë e rëndësishme", deklaroi Presidenti.