Shkolla e Policisë, sot nis konkursi për 2700 aplikantë
Bilbil Mema: Është faza e parë, vetëm 150 do kualifikohen për Patrullën e Përgjithshme
Rreth 2700 të rinj që janë kualifikuar për t'iu nënshtruar fazave të testimit për Patrullë të Përgjithshme në Kolegjin e Policisë, do nisin sot konkurrimin, të ndarë me grupe.
Ata do t'i nënshtrohen fazës së parë të konkursit, që është testimi i njohurive teorike. Drejtori i Akademisë së Sigurisë, Bilbil Mema, sqaroi se testimi do të zhvillohet në ambientet e Pallatit të Kongreseve duke dhënë edhe disa detaje të tjera rreth këtij procesi. Sipas tij, ndonëse ka pasur fluks regjistrimesh për të vazhduar kursin për Patrullën e Përgjithshme, në përfundim të të gjitha fazave, vetëm 150 vetë do arrijnë të ndjekin studimet. "Do të konkurrojnë 2700 aplikantë për 150 vende që Policia ka nevojë. Është faza e parë e konkurrimit dhe do testohen njohuritë në shkollën e mesme dhe pastaj do vijohet me pjesët e tjera të konkurrimit, që është testimi fizik. Të gjithë duhet të jenë të pajisur me dokument identifikimi, pasaportë apo kartë identiteti dhe nuk duhet të futen në sallë me aparate celularë. Rezultatin e fazës së parë e marrin menjëherë në sallë. Nuk ka komision, nuk ka njerëz që do merren me përpunimin e pyetjeve, por është makineria që është programuar në mënyrë kompjuterike dhe të gjithë aplikantët të rreshtohen sipas pikëve të tyre", u shpreh kreu i Akademisë së Sigurisë, Biblil Mema.
KONKURSI Disa ditë më parë, Policia e Shtetit njoftoi se rreth 2700 të rinj janë kualifikuar për t'iu nënshtruar fazave të testimit për Patrullë të Përgjithshme në Kolegjin e Policisë, ndërsa janë shpallur edhe datat e testimit me shkrim. Nga verifikimi i bërë rezulton se numri total i aplikantëve që plotësuan kriteret për të ndjekur fazat e mëtejshme të konkurrimit është 2679, nga këta 2295 meshkuj dhe 384 femra. Faza e parë e konkurrimit, testimi me shkrim, do të zhvillohet në ambientet e Pallatit të Kongreseve në datat: 15 dhe 16 tetor 2018, sipas numrave kodik. Më datë 15 tetor, në orën 07: 00, do të zhvillohet testimi për aplikantët e Qarqeve Dibër, Lezhë, Kukës, Durrës, Korçë e Gjirokastër, si dhe një pjesë e aplikantëve të Drejtorisë Ven- dore të Policisë Shkodër me kodet nga 0929 deri në 1000. Më datë 16 tetor, grupi i parë, në orën 07: 00, do të zhvillohet testimi me shkrim me aplikantët e Qarkut Shkodër me kodet nga 1001 deri më 1057, me aplikantët e Qarkut Elbasan, Berat, Fier, Vlorë si dhe me aplikantë të Drejtorisë Vendore të Policisë Tiranës nga numri kodit 1964 deri në 2000. Po më datën 16 tetor, grupi i dytë, në orën 11: 00, do zhvillohet testimi me aplikantët e Drejtorisë Vendore të Policisë Tiranë me kodet 2001 deri në 2677 dhe dy aplikantë me numrat e kodit 2678 e 2679.