Korrupsioni, arrestohet juristi i Hipotekës

FIER - I shpallur në kërkim për korrupsion, një jurist i Drejtorisë së Hipotekës në qytetin e Fierit, është vënë në prangat e Policisë ditën e djeshme. Policia bëri të ditur se i arrestuari është Ervis Bregasi, 32 vjeç, banues në Cakran, me profesion jurist në Zyrën e Regjistrimit të Pasurive të Paluajtshme Fier. Deklarata zyrtare e Policisë sqaron se ndalimi i tij u bë pasi Gjykata e Fierit, më 26 maj ka caktuar masën e sigurisë "Arrest në burg", për veprën penale "Korrupsion pasiv i personave që ushtrojnë funksione publike". Hetimet ndaj tij nisën pasi emisioni "Fiks Fare" denoncoi me pamje teksa ai i merrte ryshfet një qytetari 300 mijë lekë. Qytetari Ariz Çervanaku, nga zona e Frakullës në Fier, u ankua se juristi i ZVRPP Fier, Ervis Bregasi, e ka sorollatur për muaj me radhë për t'i nxjerrë cer- tifikatat e pronësisë së tokave. Në fund, juristi i kërkoi 300 mijë lekë, ndërsa kamerat fiksuan momentin kur nëpunësi i shtetit i mori ryshfetin nga qytetari që kishte nevojë për ndihmën e tij. "Unë jam 60 vjeç dhe i jam drejtuar emisionit ' Fiks Fare' se kam 3 vjet që sorollatem nëpër zyrat për të aplikuar për tokat dhe s'po m'i bëjnë certifikatat. Topografi më kërkoi 300 mijë lekë. Ia dhashë dhe po më sjell vërdallë. Vete te Hipoteka dhe ai juristi kërkon 300 mijë lekë. Unë kam 4 dynymë e gjysmë dhe e kam përfituar me ligjin 7501", deklaronte qytetari denoncues. Ai shprehet se juristi i Hipotekës i kishte kërkuar 300 mijë lekë të vjetra për t'i dhënë certifikatën e pronësisë për një parcelë. Pavarësisht publikimit të pamjeve, vetë juristi nuk e ka pranuar të këtë marrë ryshfet. m. r