Zhdukja e gazetarit, SHBA përplaset me Arabinë Saudite
Khashoggi e vetëregjistroi vrasjen e tij me “Apple Watch”
Zhdukja e një gazetari saudit brenda konsullatës së vendit të tij në Stamboll po tensionon marrëdhëniet mes Shteteve të Bashkuara dhe mbretërisë saudite.
Gazetari i njohur, Jamal Khashoggi, i cili shkruante për “Washington Post”, është zhdukur në fillim të këtij muaji pasi hyri në konsullatë për të marrë një dokument martese. Zyrtarët turq besojnë se gazetari është vrarë në mënyrë brutale nga 15 meshkuj sauditë, që ishin në konsullatë ditën e vrasjes. Ka raportime se Khashoggi e ka regjistruar me orën e tij “Apple watch” të gjithë ngjarjen. Zyrtarët turq kanë njoftuar se kanë regjistrime audio dhe video që tregojnë se një ekip sigurimi saudit ka arrestuar Khashoggi në konsullatë përpara se ta vrasin atë dhe ta shpërbënin trupin e tij, sipas “Washington Post”. Ndërsa zyrtarët sauditë thonë se Khashoggi është larguar nga ndërtesa i gjallë, pa mundur ta vërtetojnë këtë. Ngjarja ka përfshirë politikën botërore, me kërkesa llogarie ndaj Arabisë Saudite. Mbretëria Saudite kërcënoi të dielën se do të përdorë fuqinë e saj ekonomike për t’u hakmarrë ndaj çdo mase ndëshkuese, si kundërpërgjigje e deklaratës së Presidentit amerikan Donald Trump, se mund të ndërmerrte veprime kundër eksportuesit më të madh të naftës në botë, pas zhdukjes së gazetarit kritik ndaj qeverisësve sauditë. “Mbretëria thekson se do t’i përgjigjet çdo mase kundër saj me masa edhe më të forta”, tha Ministria e Jashtme saudite në një deklaratë, duke kujtuar se, “Ekonomia e mbretërisë ka një rol të rëndësishëm dhe jetik në ekonominë globale”. Trump ka premtuar ndëshkim të ashpër, nëse Arabia Saudite vërtetohet të ketë lidhje me zhdukjen e Jamal Khashoggi. Mbretëria e Bashkuar, Franca dhe Gjermania i shtuan presionet të dielën, duke bërë thirrje për një hetim të besueshëm dhe duke i kërkuar Arabisë Saudite që të japë përgjigje të detajuar mbi zh- dukjen e gazetarit. Kërcënimet shënojnë një kthesë të habitshme në marrëdhënien midis Trump dhe princit të Kurorës Saudite, Mohammed bin Salman. Që nga zgjedhja e Trump në 2016, dy vendet nënshkruan marrëveshje me qindra miliarda dollarë në investime e pakte armësh.