Opozita denoncon Ballën në Bruksel, Basha: T’i hiqet imuniteti
“Nga veprimi juaj varet stabiliteti i vendit dhe paqja sociale”
Kryetari i opozitës, Lulzim Basha, i kërkon Parlamentit të fillojë procedurën për heqjen e imunitetit për kreun e Grupit Parlamentar të PS- së, Taulant Balla.
Në një dalje për mediat, Basha theksoi se provat për inkriminimin e Taulant Ballës për të krijuar dhe paguar një dëshmitar të rremë me qëllim mbrojtjen e trafikantit të drogës Agron Xhafaj, janë publike, ndaj edhe Parlamenti duhet të veprojë. Gjithashtu, Basha ka kërkuar që Prokuroria të nxjerrë menjëherë fletarrestet për drejtorin e Përgjithshëm të Policisë së Shtetit, Ardi Veliu, dhe drejtorin e Policisë së Fierit për të njëjtën akuzë. “Faktet për inkriminimin e Taulant Ballës dhe Ardi Veliut për të krijuar dhe paguar një dëshmitar të rremë me qëllim mbrojtjen e trafikantit të drogës, Agron Xhafës, vëllait të ministrit të Brendshëm, janë të pakundërshtueshme. U bëj thirrje burrave dhe grave me kurajë në Prokurori, që në zbatim të ligjit dhe në kundërshtim të urdhrave kriminalë e të paligjshëm, të nxjerrin menjëherë fletarrestet për Ardi Veliun dhe drejtorin e Policisë së Fierit, të nisin menjëherë, pa humbur kohë, procedurën e heqjes së imunitetit dhe marrjes së pandehur të Taulant Ballës dhe të nisin hetimin për pengim të drejtësisë ndaj Edi Ramës, Fatmir Xhafës dhe Donika Prelës”, tha Basha.
HETIMET Basha ka shprehur rezerva të forta për hetimin që Prokuroria e Krimeve të Rënda po bën me çështjen e audio- përgjimit për vëllain e ministrit të Brendshëm, Fatmir Xhafaj. Për këto hetime, kreu i PD ka paralajmëruar drejtpërdrejt Kryeprokuroren Arta Marku dhe drejtuesen e Krimeve të Rënda, Donika Prela, se do të mbajnë përgjegjësi ligjore. “Manipulimi i hetimeve dhe moshetimi i krimeve nga Prokuroria janë krime të rënda, për të cilat dyshja MarkuPrela dhe shërbëtorët e saj në Prokurori do të mbajnë përgjegjësi. Shërbimi i verbër ndaj Edi Ramës është shërbimi ndaj krimit dhe për këtë do mbajë përgjegjësi çdo polici, çdo prokuror, çdo punonjës i shtetit. U bëj thirrje prokurorëve të ndershëm që t’u rezistojnë urdhrave të paligjshëm dhe arbitrarë të Arta Markut dhe Donika Prelës që janë vënë në shërbim të Edi Ramës dhe krimit për të shkatërruar hetimet dhe provat. Besnikëria juaj duhet të jetë ndaj Kushtetutës, ligjit, ndaj drejtësisë, ndaj popullit, jo ndaj politikanëve të inkriminuar dhe drejtuesve tuaj shërbëtorë të krimit”, theksoi kreu i PD- së. Basha iu kërkoi, as më shumë e as më pak, prokurorëve dhe policëve të zbatojnë ligjin dhe Kushtetutën, pasi provat janë të qarta dhe ulëritëse. “Provat janë të qarta dhe ulëritëse dhe nga vetë fashikujt zyrtarë të përgjimit të Prokurorisë del zbuluar se si kupola e Policisë, edhe e Prokurorisë, me përfshirjen e Taulant Ballës dhe nën mbrojtjen e Edi Ramës dhe Fatmir Xhafës, ka gjetur, manipuluar dhe paguar një dëshmitar të rremë për të shpëtuar narkotrafikantin Agron Geron Xhafaj, vëllain e ministrit të Brendshëm. Veproni sa nuk është vonë. Veproni jo vetëm sepse kështu jua kërkon ligji dhe Kushtetuta, por vetëdijesohuni se nga veprimi dhe mosveprimi juaj sot varet jo thjesht dhe vetëm zbatimi i ligjit, por stabiliteti i vendit dhe paqja sociale”, tha Basha. Me një thirrje të veçantë, kreu i opozitës iu drejtua edhe socialistëve të distancohen nga Edi Rama për të mos e lënë forcën e tyre politike të kthehet në një organizatë kriminale.