Opozita denoncon Ballën në Bruksel, PE mbështet hapjen e negociatave në 2019
Eurodeputetja Macovei: Akuzat për Ballën janë provuar që nuk janë të vërteta. Opozita duhet të ishte këtu për shqiptarët, jo për partinë
Në Parlamentin Europian, grupet më të mëdha politike miratuan dje në unanimitet Deklaratën Përfundimtare të Komitetit të Stabilizim- Asociimit BE- Shqipëri.
“Rishprehim mbështetjen e plotë për hapjen e negociatave të anëtarësimit në Bashkimin Europian në Qershor 2019”, thuhet në nisje të deklaratës së miratuar dje në Parlamentin Europian, sipas kryetarit të delegacionit shqiptar, Taulant Balla. Por dje në Komitetin e Stabilizim- Asociimit BE- Shqipëri, europdeputetët kanë asistuar në debatin e brendshëm të politikës shqiptare, kur opozita kërkoi largimin e Taulant Ballës si kryetar i delegacionit shqiptar. Deputeti demokrat, Genc Pollo, në emër të opozitës argumentoi se përse kërkon largimin e Ballës nga drejtimi i delegacionit të Parlamentit shqiptar. “Edi Rama nguli këmbë, ndoshta më shumë nga halli sesa nga qejfi, që Taulant Balla të mbetet fytyra parlamentare e Shqipërisë kundrejt Parlamentit Europian e Bashkimit Europian. Kjo është mënyra më efektive për të diskredituar Shqipërinë para Europës, mbasi i mbushën radhët e deputetëve e kryebashkiakëve socialistë me soj e sorollop banditësh. Pse duhet që i pari i delegacionit parlamentar në Bruksel të jetë boçe e brekushe me Begot, Beçot, Rrajat e të tjerë si ata. Apo tani që na doli ministri për Europën në biseda me bandat, kush pyet për Taulantin”, është shprehur Pollo gjatë fjalës së tij. Sipas deputetit demokrat, në PE nuk mund të flitet për krimin dhe korrupsionin, kur Balla është i lidhur me bandat. “Ne nuk mund të rrimë e të votojmë deklarata me thirrje kundër krimit te korrupsionit me Ballën në presidium. Eurodeputetët mund të mos kenë mekanizëm procedural për ta larguar Ballën. Por, siç e thanë, do zënë hundën me dorë e vazhdojnë një orë punë. Dhe po i kërkojnë llogari ekzekutivit të tyre për skandalet e shumta të Ballës. Edhe pse kjo është hera e fundit me Ballën bashkëkryetar ne këtë Parlament. Me Ballën shef delegacioni parlamentar, sabotohet integrimi europian dhe silurohet hapja e negociatave vitin tjetër”, u shpreh Pollo. Pas kësaj deklarate, deputetët e opozitës u larguan nga mbledhja e Komitetit të Stabilizim- Asociimit BE- Shqipëri.
REAGIMET Reagimi ndaj deklaratës së opozitës shqiptare ka ardhur nga kryetarja e delegacionit të Parlamentit Europian në Komitetin Parlamentar të Stabilizim- Asociimit BE- Shqipëri, eurodeputetja Monika Macovei, e cila i ka ndërprerë fjalën Pollos, duke i kujtuar se akuzat e tij janë provuar si të pavërteta. “Këto që thoni, është provuar që nuk janë të vërteta. Opozita iku që në fillim të mbledhjes, duke dëshmuar se ishin përgatitur për këtë bojkot. Opozita du- het të ishte këtu për shqiptarët, jo për partinë’, u shpreh Macovei. Në këtë debat ka ndërhyrë dhe raportuesi për Shqipërinë, Knut Fleckenstein, i cili kërkoi prova për akuzat e opozitës. “Unë nuk jam prokuror, nuk jam gjyqtar. Mund të besoj nëse Balla është një djalë i keq apo jo, por ne duam prova. Të gjithë kërkojnë prova dhe më pas mund të vendosim se si të komunikojmë. Kërkesa ime është të bëni detyrat e shtëpisë, shkoni te prokurori”, tha Fleckenstein. Edhe eurodeputeti Kukan është shprehur se këto çështje mes opozitës dhe maxhorancës duhet të diskutohen dhe zgjidhen në Parlamentin e Shqipërisë dhe jo në atë të Europës. “Këto çështje diskutohen dhe zgjidhen në Parlamentin shqiptar, jo në Parlamentin europian. Keqardhje për deklaratën dhe largimin e opozitës”, mësohet të jetë shprehur Kukan.