Pollo sqaron eurodeputetët: Tallje me dinjitetin, që Balla të drejtonte mbledhjen
Kryetari i Komisionit të Integrimit në Kuvend, Genc Pollo, shpjegoi përmes një reagimi, arsyet e qëndrimit të opozitës në mbledhjen e Komisionit të Përbashkët të Stabilizim- Asociimit. Sipas deputetit të PD- së, është tallje me dinjitetin e njeriut dhe dinjitetin e ligjit që të diskutojmë për luftën kundër krimit, ndërkohë që mbledhjen e kryeson Taulant Balla. Pollo u është përgjigjur edhe deklaratave të eurodeputetëve që kërkuan që problemet mes maxhorancës dhe opozitës të zgjidhen në Tiranë. “Bien dakord edhe shumë eurodeputetë të informuar, pavarësisht se ata ruajnë aparencat dhe thonë me të drejtë se kjo çështje duhej zgjidhur në Tiranë. Por, Rama e Ruçi nuk deshën të pranojnë një zgjidhje të thjeshtë, që ua propozuam para një jave. Të emëronin një socialist normal ( ka ende të tillë) në krye të delegacionit parlamentar. Pse nuk e bënë, e dinë ata. Ndonjë deputet thotë se kjo çështje sqarohet në Gjykatë. E drejtë edhe kjo. Aty do të sqarohet në një ditë jo të largët. Por, hë për hë, Prokuroria e gjykatat janë me probleme e nuk para merren me skandalet e qeverisë. Pastaj, politika është për të vepruar shpejt kur ka bazë e jo me vite. Dhe Balla i ka pranuar një pjesë të fajësimeve”, sqaroi Pollo. Për deputetin demokrat, eurodeputetët nuk kanë mekanizëm procedural për ta larguar Ballën, por për një orë mbledhjeje të përbashkët zënë hundën me dorë. Kreu i Komisionit të Integrimit në Kuvend beson se Parlamenti Europian nuk mund të zgjidhë problemet që ka Shqipëria, pasi, në të vërtetë, Taulant Balla është një problem që i takon rilindjes.