Përgjimi i “Babales”, Prokuroria: Rama e analizoi në laborator privat, pushohet padia
DOKUMENTI I PLOTE. SALIANJI NXJERR FASHIKUJ TE TJERE ME PERGJIME
VENDIMI I PROKURORISË
Konstatova se, pranë Prokurorisë së Rrethit Gjyqësor Tiranë, nga Prokuroria pranë Gjykatës së Shkallës së Parë për Krime të Rënda Tiranë, është përcjellë materiali kallëzues për kompetencë, i cili bën fjalë për kallëzim penal të Grupit Parlamentar të Partisë Demokratike, përfaqësuar nga z. Edmond Spaho, kryetar, dhe nga Grupi Parlamentar i Lëvizjes Socialistë për Integrim, përfaqësuar nga z. Petrit Vasili, kryetar, ndaj shtetasit Edi Rama, me detyrë Kryeministër i Republikës së Shqipërisë, për veprën penale të parashikuar nga neni 301 dhe 304 i K. Penal.
Sipas materialit kallëzues rezulton se Kryeministri Edi Rama, në mbledhjen e Grupit Parlamentar të Partisë Socialiste do të deklaronte ndër të tjera se: “... Unë e kam marrë mbrëmë përgjigjen e analizës shkencore të kryer në një nga laboratorët më seriozë të botës. Mua, ajo përgjigje më mjafton. Po bëj një parantezë. Jo për të vënë ulërimën kundër hetimit apo për të influencuar hetimin apo për të bërtitur ‘ montazh, montazh’.
Sipas kallëzuesit, me këtë deklarim publik Kryeministri Edi Rama ka kryer veprime në kundërshtim flagrant me ligjin, ku Kryeministri apo persona të autorizuar prej tij kanë marrë materialin audio të publikuar, kanë takuar dhe më pas kanë regjistruar mostrat e zërit të shtetasit Agron/ Geron Xhafaj ( është e paqartë se si është realizuar kjo teknikisht apo se ku dhe kur është kryer regjistrimi); kanë vendosur të kryejnë ekspertimin e materialit dhe krahasimin e zërit që shfaqet në materialin audio me mostrat e zërit të shtetasit Agron/ Geron Xhafaj; kanë përzgjedhur laboratorin shkencor ku do të kryhet ekspertimi dhe që ka kapacitetin teknik për ta realizuar atë; kanë dërguar ( është e paqartë forma se si) për ekspertim materialet në një nga laboratorët më seriozë në botë ( siç konsideron Kryeministri); dhe në përfundim, Kryeministri ka marrë përgjigjen e analizave, i ka vlerësuar ato dhe ka kuptuar nga përgjigjja se sipas kësaj analize shkencore, materiali audio është mashtrim dhe nuk është autentik.
Bazuar në faktet e sipërpërmendura, Partia Demokratike e Shqipërisë pretendon se shtetasi Edi Rama ka personalisht detyrimin ligjor që, për sa kohë disponon një provë, që tregon se materiali audio nuk është autentik, të paraqitet vetë menjëherë për të dëshmuar para organeve të Prokurorisë, duke i vënë në dispozicion këtë provë të siguruar prej tij, në rrugë zyrtare si Kryeministër apo në rrugë private si i njohur i Agron/ Geron Xhafajt apo mik i vëllait të tij, që është ministër i Brendshëm. Fshehja ndaj organit të Prokurorisë së një të dhënë të rëndësishme për hetimet që po zhvillohen përbën pengim ndaj drejtësisë dhe veprime a mosveprime që po pengojnë zbulimin e së vërtetës. Një veprim i tillë sjell më pas përgjegjësi penale sipas neneve 301 dhe 304 të Kodit Penal të Republikës së Shqipërisë.
Në lidhje me kompetencën lëndore për veprat penale të “Veprime që pengojnë zbulimin e së vërtetës” dhe “Detyrim për të kallëzuar provën”, të parashikuar nga nenet 301 dhe 304 të Kodit Penal, kompetenca lëndore për hetimin e çështjes i takon Prokurorisë pranë Gjykatës së Shkallës së Parë Tiranë.
Gjithashtu, Prokuroria pranë Gjykatës së Shkallës së Parë Tiranë është kompetente nga pikëpamja tokësore për hetimin e çështjes, pasi është gjykata që ushtron juridiksionin ku ka ndodhur vepra penale.
Në lidhje me faktin e pretenduar në kallëzim se shtetasi Edi Rama, me detyrë Kryeministër i Republikës së Shqipërisë, dhe njëkohësisht deputet i Kuvendit të Shqipërisë, ka kryer veprën penale të “Veprime që pengojnë zbulimin e së vërtetës” dhe “Detyrim për të kallëzuar provën”, të parashikuara nga nenet 301 dhe 304 të Kodit Penal, rezulton se fakti i pretenduar nuk parashikohet nga ligji si për veprën penale. Në rastin konkret, mungojnë elementet e veprës penale të “Veprime që pengojnë zbulimin e së vërtetës” dhe “Detyrimi për të kallëzuar provën”, të parashikuar nga nenet 301 dhe 304 të Kodit Penal.
Po kështu, personi i kallëzuar, shtetasi Edi Rama, gjatë ushtrimit të detyrës dhe funksionit të Kryeministrit të Republikës së Shqipërisë, nuk ka kryer asnjë veprim konkret për të ndryshuar vendin e kryerjes së veprës penale duke prishur, ndryshuar apo fshirë gjurmët e saj ose të duke lëvizur, fshehur, asgjësuar, vjedhur, falsifikuar një provë të rëndësishme për një çështje penale që po hetohej nga Prokuroria pranë Gjykatës së Shkallës së Parë për krime të Rënda, me qëllim për të vështirësuar dhe penguar zbulimin e veprës penale dhe të autorit të saj dhe të gjitha provat, siç del dhe gjatë kallëzimit ishin marrë nga organi procedues, si mostra zëri ashtu edhe materiali audio. Po kështu, mbi bazë të këtyre materialeve ishin vendosur dhe kryerja e ekspertimit teknik të zërit. Dhe në këtë rast rezulton se mungojnë elementet e veprës penale e konkretisht, si ato objektive e subjektive të saj, pasi sipas nenit 149 të Kodit të Procedurës Penale, prova janë njoftimet mbi fatet e rrethanat që lidhen me veprën penale, që merren prej burimeve të parashikuara në ligjin procedural penal, në përputhje me rregullat e caktuara prej tij dhe që shërbejnë për të vërtetuar kryerjen ose jo të veprës penale, që merren prej burimeve të parashikuara në ligjin procedural penal, në përputhje me rregullat e caktuara prej tij dhe që shkërbejnë për të vërtetuar kryerjen ose jo të veprës penale, pasojat e ardhura prej saj, fajësinë ose
pafajësinë e të pandehurit dhe shkallën e përgjegjësisë së tij. Po kështu, neni 151/ 1 përcakton qartë se gjatë hetimeve paraprake provat merren nga organi që procedon sipas rregullave të përcaktuara në këtë Kod ( prokurori ose polici gjyqësor). Pra, në këtë kuptim, është detyrë dhe përgjegjësi e organit procedues që të përcaktojnë kryerjen e eksperimentit në respektim të dispozitave procedurale penale. Pra, prova që pretendohet në kallëzim që nuk është paraqitur para organeve proceduese është një analizë shkencore e marrë nga një laborator privat, nga një palë private dhe nuk është marrë në përputhje të neneve të mësipërme të K. Pr. Penale. Referuar kallëzimit të mësipërm, rezulton se nga ana e organit procedues, Prokurorisë, është vendosur kryerja e një akti ekspertimi teknik dhe është pikërisht ky organ që vendos kryerjen ekspertimit.
Përfundimisht, nga aktet e administrata rezulton se nuk ndodhemi para “Veprimeve që pengojnë zbulimin e së vërtetës” si dhe të “Detyrimi për të kallëzuar provën”, të parashikuara nga nenet 301 dhe 304 të Kodit Penal, pasi faktet që përmenden nga kallëzuesi nuk parashikohen nga ligji si vepër penale.
Për këto arsye, mbështetur në nenet 277/ 3 dhe 209/ 1, germa “ç” dhe 291/ 1/ 2, të Kodit të Procedurës Penale, Vendosa: 1. Të mos fillojë procedimi penal ndaj shtetasit Edi Rama, me detyrë Kryeministër i Republikës së Shqipërisë dhe njëkohësisht deputet i Kuvendit të Shqipërisë, pasi fakti parashikohet nga ligji si vepër penale.