Tragjedia me 5 viktima, kapet në Fier një nga organizatorët
Albert Gega, i dënuar me 10 vjet bur g. Trafikantët mbushën varkën mbi kapacitet me 22 persona për t’i çuar në Gr eqi
Policia e Fierit ka ndaluar dje një prej organizatorëve të tragjedisë së Butrintit, ku 10 vite më parë humbën jetën 5 persona.
I arrestuari është shtetasi Albert Gega, i cili, sipas Policisë, rezultonte i dënuar me 10 vite burgim për veprën penale “Ndihma për kalimin e paligjshëm të kufijve”. Gega, banues në fshatin Kurjan, u ndalua gjatë një kontrolli rutinë që ka ndërmarrë Policia për kapjen e personave në kërkim. “Në tetor të vitit 2008, në Liqenin e Butrintit, shtetasi Albert Gega, në bashkëpunim me pesë shtetas të tjerë, ka ndihmuar për të kaluar në mënyrë të paligjshme 22 persona, ku 5 prej të cilëve u mbytën në liqen. Gjykata e Sarandës e ka dënuar këtë shtetas me 10 vjet burg për veprën penale ‘ Ndihma për kalimin e paligjshëm të kufijve’, parashikuar nga neni 298 i Kodit Penal”, thuhej në njoftimin e dhënë dje nga Policia e Fierit. Sapo është bërë ndalimi i tij, është njoftuar Policia e Sarandës për të vijuar me procedurat e mëtejshme. Sipas Policisë, Gega nuk ka bërë rezistencë gjatë ndalimit nga ajo, ndërkohë që nuk konfirmohet nëse ai ka jetuar në Shqipëri gjatë këtyre 10 viteve që ka qenë në kërkim.
FAMILJARET Mes 22 personave që tentuan kalimin e kufirit në tetor të vitit 2008, ishte edhe 18vjeçari Festim Hoxha nga fshati Vidhisht i Fierit, i cili u mbyt në Liqenin e Butrintit. Babai i tij, Kadri Hoxha, mes lotëve shprehet se i biri ishte në KEMP, por ishte nisur për të kaluar kufirin, duke menduar për një jetë më të mirë. “E kishin marrë për ta ndihmuar, për ta çuar tek e motra. Djalin e morën për ta çuar në Greqi, nuk ishim ne ata që e nisëm. Një djalë kisha, gjithë jetën për të punova”, shprehet mes lotësh 78- vjeçari. Edhe nëna e tij, mes dhimbjes për humbjen e djalit të saj të vetëm, shprehet se asokohe këmbëngulën që djali të mos nisej, sikur ta kishin parandier tragjedinë që do të ndodhte.
NGJARJA Tragjedia e Butrintit shkaktoi pesë viktima, mes tyre edhe foshnjën 3 muajshe, Klara. Sipas prokurorëve, viktimat ishin mashtruar nga sekserët e trafikut të qenieve njerëzore, kundrejt përfitimit të një shpërblimi të majmë, që shkonte deri në 1200 euro. Liqeni i Butrintit kalohej me varkat e peshkimit me ngarkesë sa dyfishi i kapacitetit të tyre, duke rrezikuar kështu jetën e qytetarëve që kërkonin të kalonin në mënyrë klandestine në Greqi. Varka prej druri, që shkaktoi tragjedinë, kishte nisur udhëtimin e vdekjes me 22 persona, të cilët, sapo kishin përshkuar afro një kilometër sipërfaqe ujore, u përmbytën te prita e peshkimit në Vivar. Trafikantët ishin përpjekur t’i shmangeshin Policisë Kufitare, duke shkaktuar kështu një tragjedi të rëndë me vdekjen e 5 personave, që ishin nisur drejt Greqisë. Nga hetimet u zbuluan autorët e rrjetit të trafikut me shtrirje të gjerë, si nga Fieri, Berati dhe Tirana. Njëri prej organizatorëve, Albert Gega, u largua asokohe në drejtim të paditur.