Mediat online, Basha: AKEP, Polici në duart e Edi Ramës
Reagon kreu i AKEP: Deklarata e papjekur, shikoni punën tuaj
Paralajmërimi që Autoriteti i Komunikimeve Elektronike dhe Postare u dha 44 mediave elektronike për t’u regjistruar ose do të mbyllen, për kreun e PD- së Lulzim Basha është shantazh i pastër ndaj mediave.
Përmes një reagimi lidhur me këtë vendim, Basha i ka kujtuar AKEP- it se është shndërruar në një “Polici Mendimi” në duart e kreut të qeverisë për të vrarë lirinë e shprehjes. Qëndrimi i Bashës iu referua deklaratave që Kryeministri Rama bëri pak ditë më parë në lidhje me mbylljen e çdo medie elektronike të palicencuar, e cila u pasua me një urdhër të menjëhershëm nga Autoriteti i Komunikimeve Elektronike dhe Postare. “AKEP- i është Policia e Mendimit në duart e Ramës për të kërcënuar lirinë e shprehjes dhe vrarë të vërtetën. Rama kërkon që mediat online të regjistrohen si biznese që t’u lëshojë tatimorët për t’i shantazhuar dhe dhunuar”, deklaroi Basha. Kryetari i opozitës paralajmëroi Kryeministrin dhe AKEP- in se do të dështojnë turpshëm me iniciativën e tyre për të vrarë fjalën e lirë. “Do të dështojë turpshëm, së bashku me veglat qorre në AKEP”, theksoi kreu i PD- së.
REAGIMI Akuzave të Bashës në lidhje me vendimin për të paralajmëruar mediat online të palicencuara iu përgjigj vetë kreu i AKEP- it, Ilir Zela. Në një status në “Facebook”, Zela i ka kërkuar kreut të PDsë të shohë punën e tij dhe të mos bëjë deklarata të papjekura. “Zoti Basha, ju sugjeroj të shikoni punën tuaj, e cila uroj t’ju shkojë më mirë e jo të përqendroheni në përçmimin e punës së të tjerëve. Përkundrazi. Deklarata juaj për AKEP- in është në rastin më të mirë e papjekur, ndërsa në rastin më të keq gjejani vetë emrin. AKEP- i nuk synon të mbyllë asnjë media online, sepse po ta kishte këtë synim do të mjaftonte zbatimi i ligjit ekzistues, miratuar me votën tuaj, për të mbyllur një pjesë të madhe të tyre. Por jo, AKEP- i synon të ndihmojë formalizimin e të gjitha portaleve on- line dhe kërkesa për vendosjen e NIPT- it në seksionin KONTAKT të faqes ueb buron nga ligji, jo nga ndonjë synim i erret i AKEP- it. Prandaj zoti Basha, shikoni punën tuaj dhe nëse nuk e ndihmoni dot, të paktën mos e sulmoni e shantazhoni AKEP- in. Sepse AKEP- i është një institucion i ligjshmërisë dhe shtetit të së drejtës, jo një vegël qorre siç qorrazi e etiketoni ju”, u shpreh kreu i AKEP- it.