“Doktorët gazmorë”, trajnime për mjekët dhe infermierët shqiptarë
Mjekët nuk do të jenë vetëm ata që na japin ilaçe, por do të jenë edhe ata që do të na bëjnë të qeshim. "Doktorët gazmorë" është programi që do të mundësojë trajnimin e rreth 30 mjekëve dhe infermierëve shqiptarë nga një ekip izraelit. Këta profesionistë të përzgjedhur do të trajnohen për të qenë sa më miqësorë me pacientët e vegjël. "Kjo mënyrë e re e trajtimit të fëmijëve në spitale do të mundësojë që ata të mos ndihen si në spital. Sigurisht, medikamentet bëjnë pjesën e tyre, por edhe sjellja e mirë është një element më shumë për t'u shëruar sa më shpejt", tha ministrja e Shëndetësisë dhe Mbrojtjes sociale Ogerta Manastirliu, gjatë një vizite në ambientet e Spitalit Pediatrik në QSUT, ku ekipi doktorëve gazmorë profesionistë nga Izraeli performuan për pacientët e vegjël. Duke treguar mbështetjen për trajnimet e ekipeve shqiptare, ambasadori i Izraelit u shpreh se "Është e provuar që t'u kthesh buzëqeshjen fëmijëve i ndihmon të shërohen më shpejt, ndaj jam shumë i lumtur që konkretizuam përpjekjet disamujore për realizimin e këtij projekti të Agjencisë së Zhvillimit të shtetit të Izraelit me Ministrinë e Shëndetësisë". Sipas Ministrisë së Shëndetësisë, trajnimi i mjekëve dhe infermierëve do të zhvillohet nga data 15- 20 tetor në Tiranë, ku ekipi profesionist i "doktorëve gazmorë" të Izraelit do të prezantojë teknikat e terapive për pacientët, jo vetëm ata në Pediatri, për t'ua bërë sa më të lehtë qëndrimin në spital. "Dream Doctors" janë animatorë mjekësorë profesionistë, të cilët janë të trajnuar për terapi pacienti gjatë shtrimeve në spital apo trajtimit ambulator. Kjo praktikë e njohur botërisht ka të integruar këta profesionistë në stafin mjekësor multidisiplinar, kryesisht ( por jo vetëm) në repartet pediatrike.