"Kam gruan shtatzënë", burg ish- drejtorit të Hipotekës
Apeli nuk merr parasysh rrethanën familjare të Zamir Lekës
Gjykata e Apelit ka lënë në fuqi vendimin e Shkallës së Parë, duke lënë në "arrest me burg" ish- drejtorin e Hipotekës në Shkodër, Zamir Leka.
Po ashtu, edhe ish- juristja e Hipotekës në Shkodër, Frida Mirashi, është lënë me masën e sigurisë "arrest shtëpie", duke lënë në fuqi të njëjtin vendim të Shkallës së Parë. Gjatë seancës në Apel, pala mbrojtëse e ish- drejtorit të Hipotekës në Shkodër ka kërkuar një masë më lehtësuese, duke marrë parasysh rrethanat familjare. Bashkëshortja e tij është shtatzënë, ndaj është kërkuar një masë më e butë. Për këtë, Leka ka qenë i gatshëm që të vendosë edhe garanci pasurore. Por kjo kërkesë nuk është pranuar nga Gjykata e Apelit dhe ish- drejtori i Hipotekës është lënë sërish në burg. Zamir Leka akuzohet nga Prokuroria për korrupsion në lidhje me disa dosje, gjatë kohës kur drejtonte Hipotekën e Shkodrës, por ai i ka hedhur poshtë këto akuza. Hetimi për këtë çështje vijon nga ana e organit të akuzës.
ARRESTIMI
Ish- drejtori i Hipotekës së Shkodrës, Zamir Leka, u arrestua më 25 shtator të këtij viti ndërsa ndodhej si zakonisht në zyrën e tij. Fillimisht, Gjykata e Shkallës së Parë pranoi kërkesën e Prokurorisë duke caktuar masën e sigurisë "arrest me burg" pas arrestimit të tij, i akuzuar për korrupsion pasiv dhe kërcënim të punonjësve për shkak të detyrës. Për juristen Frida Mirashi, Gjykata fillimisht e la me masën e sigurisë "arrest shtëpie".
Sipas Prokurorisë, gjatë hetimeve paraprake ka rezultuar e provuar se shtetasi Zamir Leka, me detyrë regjistrues pranë ZVRPP Shkodër, në mënyrë të parregullt pranonte përfitime nga të tjerët, në këmbim të kryerjes së një veprimi, konkretisht regjistrimit të pasurive, lejeve të legalizimit etj., detyrë funksionale kjo e tij. Organi i akuzës thotë se ka re- zultuar e provuar që shtetasi Zamir Leka, në kundërshtim me ligjin dhe në mospërmbushje të rregullt të detyrës së tij, mbante praktika të caktuara, për të cilat më parë është marrë vesh për pagimin e shumave të kundërligjshme deri ne 5000 euro apo i mbante në pritje të ofertave nga të interesuarit dhe në momentin që merrte përfitimin e kërkuar, i kalonte praktikat përkatëse te juristët e zonave, në disa raste vetë dorazi, në disa raste të tjera nëpërmjet juristes Frida Mirashi, e cila rezulton të ketë bashkëpunim të ngushtë me të dhe për zonat që nuk mbulohen prej saj. Kjo e fundit ua kalon specialistëve të tjerë me shënimin "Porosi e shefit", duke kërkuar përfundimin e praktikës menjëherë. Gjatë hetimeve paraprake Prokuroria bën të ditur se ka rezultuar e provuar se shtetasi Zamir Leka ka regjistruar disa praktika tërësisht në kundërshtim me ligjin, pa kryer verifikimet përkatëse. Lidhur me juristen Frida Mirashi, gjatë hetimeve rezultoi e provuar se kjo shtetase ka pasur bashkëpunim të ngushtë me Zamir Lekën.