Zyrtarët serbë “tërbohen” nga ambasadori i SHBA
Vuçiç: Diplomati Scott duhet të tregojë më shumë respekt për ne
Deklarata e ambasadorit të SHBA- ve në Beograd, Kyle Scott, se Kosova është vend sovran dhe i pavarur, ka nxitur reagime të ashpra nga zyrtarët më të lartë serbë, edhe në këtë rast kur bëhet fjalë për një të vërtetë të dukshme.
Presidenti i Serbisë Aleksandar Vuçiç ka thënë se çfarëdo që të jetë Kosova për Shtetet e Bashkuara, për Serbinë është një “i ashtuquajtur shtet”, pasi ky vend e konsideron ende republikën dhjetëvjeçare si një territor të vetin. Ndërsa Kryeministrja Ana Brnabioc e ka quajtur deklaratën e Scott, skandaloze. Brnabiç ka vlerësuar edhe përgjigjen nga ministri i Brendshëm, Aleksandar Vulin, ndaj deklaratës së ambasadorit amerikan. “Më vjen keq që ambasadori Scott nuk u përpoq të tregonte arrogancën e tij në ndonjë ngjarje me Presidentin Vuçiç të pranishëm, sepse ai do të dilte nga ndërtesa, por së paku Serbia mund të shihte se kush po lufton për Serbinë dhe kush ka shqetësim vetëm për fundshpinën e vet”, ka thënë Vulin. Ambasadori Scott e bëri vërejtjen si pjesë të përgjigjes së tij ndaj pyetjes së një gazetari gjatë nënshkrimit të një memorandumi midis qeverisë serbe dhe kompanisë amerikane “Bechel”. Scott ka korrigjuar një gazetar në pyetjen mbi Kosovën, duke thënë se territori ishte i njohur nga SHBA si sovran dhe vend i pavarur. Kryeministrja e Serbisë e konsideroi deklaratën si “skandaloze dhe të papërshtatshme”. Ajo vuri në dukje se ambasadori amerikan ka qenë me të në takime dhe e di që nëse dikush e quan Kosovën një shtet, ato takime ndërpriten dhe dikush largohet nga ndërtesa e qeverisë. “Që ai të dalë dhe të deklarojë një gjë të tillë, është shumë e papërshtatshme”, tha Kryeministrja. Ndërsa Presidenti Aleksandar Vuçiç tha se “Do të ishte mirë nëse ai do të tregonte pak më shumë respekt për vendin pritës”, tha Vuçiç për Scott, duke shtuar se përfaqësuesi i qeverisë serbe që ishte i pranishëm gjatë ngjarjes ( ministrja e Transportit dhe Infrastrukturës), duhet të kishte reaguar”. “Çfarëdo qoftë për ju e ashtuquajtura Qeveri e Kos- ovës, për ne është një e ashtuquajtur”, tha Vuçiç duke theksuar se “detyra e një diplomati nuk është të bëjë korrigjime, por t’u përgjigjet pyetjeve që iu paraqiten. Për fat të keq, nuk isha atje”, tha Vuçiç. Presidenti shtoi se nëse ai do të ishte në këtë ngjarje, Scott do të kishte marrë “një përgjigje të sjellshme dhe të matur që do të kishte mbrojtur interesat shtetërore të Serbisë”. Ai gjithashtu kujtoi se kjo nuk është një pozitë e re e administratës amerikane dhe për këtë arsye ai është më skeptik për çështjen e qëndrimit të Uashingtonit ndaj Kosovës dhe Metohisë sesa ministri i Jashtëm serb, Ivica Daçiç. Ky i fundit ka këmbëngulur kohët e fundit se Kosova duhet të kuptojë se nuk është më e përkëdhelu- ra e Uashingtonit dhe se gjërat kanë ndryshuar në qëndrimin e SHBA- ve për rajonin. Por Vuçiç është i qartë se ka të bëjë me një fuqi të madhe, me të cilën duhet të diskutojë. “Është e drejta e tyre, por edhe stili i tyre për të komunikuar në atë mënyrë dhe për të përfaqësuar interesat e tyre, ndërsa është puna jonë për të mbrojtur tonat”, tha ai.