Balla, padi Bashës e Salianjit: Opozita t’i japë fund bojkotit
“Opozita duhet të reflektojë, të ndërpresë bojkotin e të marrë përgjegjësitë që i takojnë”
Kryetari i Grupit Parlamentar të PS, Taulant Balla, i kërkon opozitës të ndërpresë bojkotin dhe të rikthehet në Parlament. Thirrja e Ballës erdhi menjëherë pas anulimit të mbledhjes së Komisionit të Integrimit në Kuvend për shkak të mungesës së kuorumit.
Balla i ka kujtuar opozitës edhe rekomandimet e Parlamentit Europian që sugjerojnë një ndërprerje të bojkotit nga opozita. “Kurrë më parë në Parlamentin Europian nuk kemi arritur të marrim një produkt final, një deklaratë e cila fillon në fjalinë e parë: Komiteti Parlamentar i Stabilizim- Asociimit Shqipëri- BE kërkon hapjen e negociatave në qershor 2019, në vijim të vendimit të Këshillit Europian të 28 qershorit. Pavarësisht kësaj, është shumë e rëndësishme sot, ju ndiqni punimet e Kuvendit, që rekomandimet përfundimtare të takimit flasin për një ndërprerje të bojkotit nga ana e opozitës. Këtu dua të ricitoj një qëndrim në radhë të parë të Partive Popullore Europiane ( PPE), të z. Doll, i cili e njeh shumë mirë Shqipërinë dhe që në të njëjtën referencë me partinë simotër në Maqedoni flet edhe për Partinë Demokratike në Shqipëri, e cila unë vlerësoj që duhet të reflektojë edhe pas deklaratave të këtyre rekomandimeve të ndërpresë bojkotin dhe të marrë përgjegjësitë që i takojnë.
PËRPLASJA Për kreun e Grupit të PS- së, Taulant Balla, sjellja e opozitës në Bruksel ishte e turpshme. Duke komentuar deklarimin e deputetëve të PD- së në sallën e Parlamentit Europian dhe largimin e tyre, Balla flet për një sjellje që nuk i bën nder Shqipërisë. “30 sekonda të një fjale të parapërgatitur nga Lulzim Basha dhe të lexuar nga kryetari i Komisionit të Integrimit nuk e prish aspak arsyen përse ishte takimi i 13- të i Komitetit të Stabilizim Asociimit. Opozita ende nuk dihet ku është dhe ajo shfaqje e turpshme në Parlamentin Europian le të jetë një akt i fundit i sjelljes në vijë të ndryshme i të gjithë politikës shqiptare në Bruksel. Sjelljet si ajo e kryetarit të Komisionit të Integrimit nuk i bëjnë nder Shqipërisë”, theksoi Balla. Deputeti socialist kërkoi nga opozita që debatet t’i zhvillojë në Parlament dhe jo në Bruksel, në një kohë që vendi, vitin e ardhshëm, pret çeljen e negociatave.
PADITË Ashtu siç edhe kishte paralajmëruar, Balla depozitoi në Prokurorinë e Krimeve të Rënda kallëzim penal për shpifje ndaj kreut të PD- së, Lulzim Basha, deputetit demokrat Ervin Salianji, dhe ish- kreut të IMT në Bashkinë e Tiranës, Florenc Hoxha. Paditë e Ballës ndaj përfaqësuesve të opozitës lidhen me akuzat e tyre për çështjet e njohura, si “Babale”, dhe udhëtimet e pretenduara me biznesmenin e dënuar për trafik droge, Edmond Bego. Balla ka paralajmëruar një tjetër padi edhe për deputetin Gent Strazimiri në lidhje me akuzat e tjera për Ballën gjatë deklaratës së djeshme nga selia blu. “Pas depozitimit të kallëzimit në Prokurorinë e Krimeve të Rënda, mësova se të kallëzuarve të sotëm u ishte shtuar me vullnetin e tij të plotë prej shpifësi, Gent Strazimiri. Të cilin ju informoj publikisht se do ta bashkoj me shokët e vet në radhën e shpifësve të kallëzuar prej meje. Plani i kontributeve nga xhepat e shpifësve për Fondin e Edukimit ecën për bukuri. Mirëpresim shpifësin e radhës!”, tha Balla.