Vasili: Prokuroria e kapur nga Rama, Reforma në Drejtësi ka vdekur

Kryetari i Grupit Parlamentar të LSI, Petrit Vasili, ka akuzuar institucionin e Prokurorisë si të kapur nga politika. Në një deklaratë për media mbi vendimin e Prokurorisë për të mos hapur hetim ndaj Kryeministrit Rama, mbi padinë e bërë nga opozita për audio- përgjimin e çështjes “Babale”, Vasili theksoi se ky është një vendim i ndikuar nga politika. “Akti i fundit i këtij bllokimi të kallëzimit penal nga ana e Prokurorisë i vë vulën përfundimisht me duart e tyre, me ato që shkruajnë vetë, qartësisht situatës së një drejtësie të kapur dhe përfundimisht asaj që unë kam insistuar ta quaj një Reformë në Drejtësi, të cilën Edi Rama bëri të pamundurën ta kapte dhe ta varroste. Pra, ta bënte një Reformë të vdekur në Drejtësi”, tha Vasili. Në reagimin e tij, Vasili e konsideroi si të palogjikshëm bllokimin e padisë së opozitës. “Të gjithë shqiptarët duhet ta dinë që Prokuroria ka vendosur bllokimin e kësaj padie të bërë nga ne dhe mos fillimin e procedimit penal ndaj Edi Ramës, Kryemi- nistër i Shqipërisë. Prokuroria e Përgjithshme e ka vendosur këtë moskallëzim, duke pretenduar që Edi Rama përfundimisht i është drejtuar një laboratori privat si një person privat dhe ka thënë praktikisht, tekstualisht, këto fjalë: Prova e paraqitur që pretendohet në kallëzim, kallëzimin e bërë prej nesh është një analizë shkencore, thotë Prokurori, e marrë nga një laborator privat nga palë private. Ky është turpi edhe profesional, turpi edhe politik dhe është thelbi që Prokuroria është thjeshtë dhe vetëm një mbyllëse e çështjeve”, tha z. Vasili.