Reagon Bushati: Me Kotzias hapëm faqe të re bashkëpunimi
Për dorëheqjen e ministrit të Jashtëm grek, Nikos Kotzias, ka reaguar edhe homologu shqiptar, Ditmir Bushati. Në një status në “Twitter”, ai falënderon ish- kryediplomatin grek për kontributin që ka dhënë për çështjet që lidhen me Shqipërinë. “Ka pak gëzime në këtë profesion, por ato më të çmuara rrjedhin nga bashkëpunimi i vërtetë dhe një frymë kolegjialiteti. Faleminderit @ NikosKotzias për përpjekjet tuaja në hapjen e përbashkët të një faqe të re të bashkëpunimit, besimit dhe marrëdhënieve të mira fqinjësore midis vendeve tona”. Pas këtij reagimi të ministrit të Jashtëm të Shqipërisë, Bushati, ka reaguar dhe Partia Drejtësi, Integritet dhe Unitet. “Ministri ynë i Jashtëm paska shprehur falënderimin për ministrin e dorëhequr të shtetit grek, Kotzias. Nuk di se për çfarë e falënderon homologun e uzos dhe të Zorbës ministri ynë? E falënderon për varret e ushtarëve grekë, që sot ngrihen në territorin tonë, megjithëse erdhën si pushtues, ndërsa të rënët tanë, që u therën në prag të shtëpisë, ende sot janë shpirtra pa varr? E falënderon për marrëveshjen e turpshme të toponimeve që heq qytetet e vendlindjes së pleqve tanë nga pasaportat e shtetit shqiptar, duke vazhduar kësisoj politikën e diskriminimit ndaj nesh? E falënderon për marrëveshjen e ujërave, për të cilën Kotzias mburrej se do merrte ujërat tanë, duke zgjeruar të vetat nga 6- 12 milje?”, thuhet në deklaratën e PDIU- së. Sipas Partisë Drejtësi, Integritet dhe Unitet, Çamëria do ia ngrijë buzëqeshjen. “E falënderon se mos hoqi ligjin e luftës, e sot ministri ynë bën sikur harron se po falënderon ministrin e një shteti, me të cilin është zyrtarisht në luftë? E falënderon se bërtiste që çështja ‘ Çame’ nuk ekziston e që shqiptarët e Çamërisë ishin bashkëpunëtorë me nazizmin? E falënderon se po punonin bashkë për të hequr termin ‘ Çamëri’ nga tekstet shkollore shqiptare? Por ‘ Çamëria’, duhet ta dini që do jua ngrijë buzëqeshjen në buzë njësoj si Kotzias- it. E drejta e nëpërkëmbur e shpirtrave, që humbën jetën dhe të atyre që lanë pas një jetë të tërë e shtëpitë e tyre, është haku njerëzor që do ngrijë çdo akt tradhtie ndaj saj e do na mbajë gjithë jetën tonë përballë armiqve e në krah të miqve. Ne nuk harrojmë!”, thuhet në deklaratën e PDIU- së.