Meta: Varfëria nuk luftohet me nxitjen e kanabisit
“As bastet nuk janë zgjidhje për të shpëtuar nga varfëria”
Presidenti Ilir Meta, në kuadër të Ditës Botërore kundër Varfërisë, zhvilloi dje një vizitë në një biznes fason, ku vlerësoi modelin e kësaj sipërmarrjeje. Gjatë fjalës së mbajtur, ai theksoi se mbështetja e këtij sektori është zgjidhje për të luftuar varfërinë dhe për t'i larguar shqiptarët nga veset e këqija. "Duhet të mendojmë të gjithë në këtë drejtim, që të kemi një shoqëri më të shëndetshme. Nuk mund të jetë zgjidhje as nxitja e kanabisit apo forma e ' aventura' të tilla, që e dimë se sa shumë i kanë kushtuar vendit dhe familjeve shqiptare. Janë mijëra njerëz që janë nëpër burgje, strese pa fund, e shkatërrime familjesh që ka prodhuar ky fenomen. As bastet nuk janë zgjidhje për të shpëtuar nga varfëria, por vetëm puna e qëndrueshme, me standarde, me përgjegjshmëri të tillë sociale, që ne duhet ta nxisim më shumë, duke motivuar dhe duke mbështetur ata investitorë, të cilët e tregojnë këtë me shembuj konkretë",- tha Presidenti, duke shtuar se: "Lufta kundër varfërisë, nuk zgjidhet as me një thes miell. Natyrisht, çdo kontribut, çdo bamirësi është pozitive, por rruga e sigurt dhe e qëndrueshme është rruga e integrimit në tregun e punës".
Ndër të tjera, Presidenti Meta falënderoi mbështetjen e USAID për këtë biznes, që, siç tha ai, duhet të kthehet në një model motivues për shoqërinë shqiptare. "Gëzohem shumë që shoh shumë vajza të reja këtu dhe kjo është një tregues shumë i mirë dhe shumë pozitiv. Falënderoj USAID- in dhe qeverinë amerikane për ndihmën dhe mbështetjen, që i jep këtij biznesi social dhe duhet të bëjmë çdo gjë që edhe ne të kontribuojmë më shumë për t'i shumëfishuar këto lloj biznese, për t'i bërë një model udhëheqës dhe motivues për gjithë shoqërinë mënyrë që të mos respektohet më ai që është më i fortë, ai që është më i parregullt, ai që shkel rregullat e lojës, por në këtë shoqëri duhet të respektohen njerëzit që sjellin vlera, njerëzit që tregojnë kujdes për ata që janë më në vështirësi, që u japin dorën, që i integrojnë dhe që i ndihmojnë të ecin vetë në jetë me mundësitë e tyre dhe me dinjitetin e tyre", - u shpreh Presidenti i Republikës.